Base sa gipagawas nga 2020 audit report nga pinirmahan sa COA’s Supervising Auditor Maria Daisy Bercede natala nga kalapasan ang gihimo sa lungsod sa Minglanilla nga mihatag og P8.9 milyones nga hazard pay ngadto sa kapin sa 500 ka mga opisyal sa barangay ug kawani.
“Barangay officials and employees who are not considered as personnel of the Municipality or are workers engaged through contract of service (CO) /Job Order (JO) by the Municipality constitutes irregular disbursement,” tipik sa natala sa maong audit report pinitsahan niadtong Mayo 31, 2021.
Dugang pasabot sa ahensiya nga ang matag barangay adunay kaugalingong budget alang sa maong katuyoan.
Samtang ang lokal nga kagamhanan sa Minglanilla inisyal nga mitubag sa COA nga mihatag sila og hazard sa mga barangay opisyal ug kawani gumikan sa ilang padayon nga pagserbisyo atol sa pandemiya.
Misaad nga ilang susihon pag-usab ang budget circular sa COA aron nga tun-an ang ilang nahimong transaksiyon.
Nasuta sab sa maong ahensiya nga sa 19 ka barangays, 12 ka barangays ang nakaduso og supporting documents sa maong transaksiyon.
Gikatahong kalapasan sa “Item 4 of DBM Budget Circular No. 2020-1” ang paghatag og hazard pay sa maong lungsod.
Tungod niini nimando ang COA sa lungsod sa Minglanilla og refund gikan niadtong mga barangay opisyal ug kawani nga nakadawat sa maong ‘hazard pay’, “Otherwise the amount disburse will be disallowed in audit,” natala sa audit report. (ANV)