Delos Reyes: Kinsay mangahas pagsukol kang Mayor Sara?

MAAYONG adlaw, mga Super Suki. Manukad na sab ta alang sa laing isyu subay sa dagan sa panahon.

Ang Regional Party nga gitukod ug gipangunahan ni Davao City Mayor Sara Duterte Carpio, posible nga mahimo nga usa ka nasudnon nga partido politikal nga pasilongan sa mga politiko nga buot mosuporta kang Mayor Sara sa umaabot nga lahugay sa politika sa 2022.

Duna nay lima ka mga partido politikal nga mipadayag nga makigdugtong sa Hugpong ng Pagbabago (HNP) kon modesisyon na si Mayor Sara nga mo-file sa iyang Certificate of Candidacy karong bulan sa Oktubre.

Usa sa mga mipasibaw nga mosuporta kang Mayor Sara mao ang partido political ni kansi Senador Meriam Defensor Santiago.

Atong makita nga katawhan ang nagapaduol aron mosuporta kang Mayor Sara, dili si Mayor Sara ang nagaduol aron mohangyo sa suporta sa katawhan tungod sa ilang panglantaw nga kalamboan nga wa nila natagamtam sa milabay nga mga administrasyon, kang President Rodrigo Duterte lang.

Dili nato mabasol ang katawhan kay ang kasaysayan sa atong nasud maoy mopamatuod nga dunay pagpihig ug salin na lang ang gidawat sa mga taga Mindanao tungod mas gipalabi ang kalamboan sa Luzon kon kalamboan ang hisgutan.

Gusto sa katawhan nga ipadayon ang pag-uswag, ang mga project nga biyaan ni President Digong human sa iyang termino sa pagka-pangulo.

Dili man perpekto ang administrasyon ni Pangulong Digong apan daghan siya'g kaayohan nga nahimo sulod sa unom ka tuig niya nga pagdumala sa nasud.

Ang mga nagalingkod karon nga mga senador ubos sa partido sa HNP nagapaabot sab kang Mayor Sara ug andam mosuporta sa panahon nga siya na ang magadumala sa iyang panahon.

Dakong bintaha kini ni Mayor Sara kon itandi sa oposisyon nga hangtud karon wala pa makapanukad kinsa ba gyud ang ilang himuon nga pangbato pagka-presidente sa umaabot nga eleksiyon tungod sila mismo sayod unsa ug kinsa ang ilang banggaon.

Ang pagkaparot sa mga kandidato sa oposisyon sa milabay nga eleksiyon nagpabilin pa nga samad nga wa maalim hangtud karon ug nahimong sukdanan sa katawhan sa kalidad sa ilang mga kandidato nga iparang sa mga kandidato sa administrasyon.

Kon nahimo ni Mayor Sara ang pagpadaug sa iyang mga kandidato panahon sa midterm election, mahimo kaha niya alang sa iyang kaugalingon?

Ang ulahing survey nga gipagawas sa Pulse Asia makabugnaw sa mga naghunahuna nga moatbang kaniya kay basin mahulog nga ilabay lang nila ang ilang kuwarta sa way purohan nga sultada.

Kon ikaw ang naa sa kahimtang sa oposisyon karon, mangahas pa kaha ka?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph