NADISKUBRIHAN sa Municipal Health Office (MHO) pinaagi sa mga resulta sa reverse transcription-polymerase chain reaction (RT-PCR) test nga tulo sa 444 ka mga pasyente sa diarrhea sa Barangay Tulalian, Santo Tomas, Davao del Norte nagpositibo sa Covid-19 virus.
Sumala ni Mart Sambalud, municipal information officer sa Santo Tomas, usa ka 20 anyos ang symptomatic samtang duha ang asymptomatic.
Nauna nang giingon ni Municipal Health Officer Dr. June Lim nga ulahi na nilang nasayran nga daghan na ang nagka-diarhhea sa dapit gumikan giantos lamang sa mga pasyente ang sakit diha sa ilang mga balay. Wa sila mosumbong sa awtoridad kay dili sila ganahan nga madala sa ospital tungod mahadlok matakdan sa Covid-19, apan tulo na diay kanila, nagdala na sa maong virus.
Subay sa datus gikan Hulyo 20, 2021, anaa na sa 444 diarrhea cases ang natala sa Barangay Tulalian diin sa 99 ka mga pasyente nga gipaubos sa RT-PCR swab, tulo ang nagpositibo.
Kini nga mga pasyente ang nakasinati og pagluya apan walay simtomas sa dehydration samtang sa ihap, anaa sa 17 ka mga pasyente ang gipaubos sa rectal swab, diin anaa sa walo ang nagpositibo sa cholera.
Misaka sab ngadto sa tulo ang namatay sa Barangay Tulalian tungod sa kalibanga human nadugang sa talaan ang duha ka mga namatay niadtong Hulyo 20, 2021.
Sa report nga gipadala sa Santo Tomas Municipal Information Office, usa ka senior citizen ang ulahing namatay. Nasundan kini sa usa ka 81-anyos ug 69-anyos nga mga babaye, kinsa gipaubos na sa post-mortem Covid-19 testing ang mga patay nga lawas niini.
Miyerkules sa hapon, anaa sa 27 ang ihap sa mga naalibyohan. Sa 27 nga ihap, 23 niini mild dehydration, duha ang hypertension stage II, duha ang systemic viral infection ug walay na-admit. (Jeepy P. Compio)