ANG mga traditional nga paagi sa kampanya alang sa sunod tuig nga eleksiyon gidili na. Matod pa sa tigpamaba sa Commission on Elections (Comelec), James Jimenez, nga kining gitawag og public display of affection (PDA) nga maoy sagad nga himuon sa mga pulitiko panahon sa kampaniya aron makadani sa mga botante gidili na gumikan sa Covid-19 pandemic.
Unsa man kini? 1) Panagtapok sa daghang tawo; 2) Ang pagpanglamano sa kandidato ngadto sa mga botante; 3) Ang minaot nga kugos-kugos ug halok-halok sa mga bata. Gipaabot ang magpungasi nga nilabayay og lapok ingon man ang pagkatap sa mga fake news sa social media. Ang kadtong mga asyuso nga inig lamano manghugas dayon og alcohol sa ilang mga kamot, makarason na karon nga kanunay magdala-dala og alcohol kay ting-Covid man.
Kining tanang kausaban nagagumikan niining pandemiya nga gikahadlukang mamahimong super spreader event. Pero kon maghisgot kita og first time, ato untang panghinauton nga tinuod nga mogamit sa utok ang mga botante ug dili magpadayon ang naandan nga pagbaligya sa ilang mga boto bugti sa pipila ka gatus o libo ka pesos gikan sa mga pulitiko.
Tapok-tapok
Gumikan niining maong mga lagda, wa nay mga pulong-pulong matag gabii sa mga sityo o baryo. O ba kaha wala nay mga miting de avance nga binayran ang mga manambong gumikan kay gidili na man lagi ang tapok-tapok.
Paminaw nako, morag ang away sa kampaniya ani adto na sa social media o ba kaha sa mainstream media, kadtong maka-afford pag-blocktime og radio hours. Modaghan na unya ang mga radio blocktimers ani.
Sa social media kadtong maka-afford og hire og trolls mas may bentaha. (Trolls kanang maoy mo-post og mga pagdayeg ug komentaryo sa social media). Mao nay angay bantayan sa publiko kay basin og mabiktima sa fake news. Wala man god na silay “responsibilidad” o adunay magbantay o mobadlong nila. Dili sama sa mainstream media nga naay editor ug managers. Unya ang vote buying dili na isukip sa sample ballot. I-pera padala na lang pod kay wala may personal contact sa mga botante. (bobbygnalzaro@gmail.com)