SUPERBALITA CEBU

Super Ka! Werpa Food park: Bag-ong tambayan gipistahan

IMAGINA, gilibutan mo sa mga lamiang pagkaon nga maabot ra sa bulsa, hamugaway ang lugar ug daghang kaposingan tungod kay picture perfect ang palibot ug lapad pa kaayo ang luna sa taas diin tua ang function room, Bean Bags plus live acoustic bands on weekends as in nindot gyud tambayan.

Mao na ang Werpa Food Park nga makita atbang sa Lourdes Parish Church sa Punta Princesa sa Labangon. Sukad nag-soft opening sila niadtong Biyernes, Hulyo 16, blockbuster kay wa gyuy hubashubas ang mga tawo.

Apan giklaro sa magtiayong Nathaniel ug Miña Richie Bunyi nga maoy tag-iya sa Werpa nga 250 persons ra ang ilang gitugotan makasud o 50% sa kapasidad base sa IATF. Bawal sad ang jamming ingon man ang vaping ug panigarilyo.

“Puwede makainom pero moderate lang and no hard liquor para chill ra gyud ang place. We’re open from 10 am to 10 pm ug ang makasud 15 to 65 years old ra,” ni Miña sa interbyu sa Superbalita Laysho.

Nganong Werpa?

“Werpa kay binali sa power. Di ba uso man ang binali sama sa petmalu, lodi, sakalam for easy recall sad. But Werpa means `Where exciting real pakal awaits,’” esplika pa ni Miña.

Matod ni Nathaniel o Natnat nga na-inspire sila mag-open og food park bisan pandemic kay ang ilang mga suki sa Werpa dihang naa pa ni sa Basak, San Nicolas sigeg pangutana kon kanus-a sila mag-open og balik.

Daghang uhaw sa kalingawan ug kasuroyan tungod sa nagpadayong health and safety protocols.

“We had our first Werpa in 2018 pero tungod sa pandemic naundang. Mao to nangita mi og laing location kay kadtong Werpa sa Basak sudlunon ug problema sa parking unlike dinhi nga just few steps away from the highway lang ug dunay klarong parking space.”

Sa pagkakaron, duna nay 11 nga nag-operate sa 22 ka mga tenant sama sa Korean street food, Japanese, tapsilog, chicken wings, burger, sizzling, barbecue, lechon belly ug mga refreshment.

From rags to riches

Si Miña usa ka nursing graduate samtang si Natnat gradwado sa computer. Pareho silang nagtrabaho niadto sa pribadong kompanya apan paglabay sa usa katuig nang-resign aron magnegosyo.

“Wa gyud mi kuwarta sa una. Unya nasakit pa iyang papa. Bisan unsa ray among gisudlan. Nag-peso net mi, nag-computeran, nag-abli mi og videoke. Then niangkat mi og beauty products nga among gi-rebrand, nisikat man sad. Mao to pag-2012 naghimo mig amoa ug karon exclusive na gyud ni namo ang Nathiña beauty products.”

Ang Nathiña kombinasyon sa ilang pangan nga aprubado sa Food and Drug Administration diin ang ilang market naglakip sa California, Hong Kong ug Canada.

“Duna mi licensed chemist ug laboratory. Hilig gyud mi ni Miña mag-night-out as part sa among relaxation kay decision-making man ang usual work namo sa Nathiña. Bisan asa ra mi mag-unwind pawala sa stress. Mao to ako siya giingnan nganong dili na man lang ta maghimo og ato-a uy aron duol ra. Mao nga nahimugso ang Werpa.”

“Naa baya mi napalit nga 1,000 plus square meter lot sa Busay nga duol ra jud sa highway. Maoy among plano sunod unta himuong food park pero paminawon sa nato,” paambit ni Miña. “Pero lain sad kaayo mag-una mi didto sa ibabaw ari sa ta sa duol-duol,” ni Natnat dungan sa ilang pagpangatawa.

LOVE STORY

Si Miña, 33 anyos ug Natnat, 34, nagpakasal karon na lang bag-o human sa 18 katuig nilang panag-uyab tungod kay mas giuna nilang ma-stable una labi na sa pinansyal nga aspeto.

“Nagkauyab mi fourth year high school pa. CIT siya then ako sa Abellana ug Concord. Silingan ra man mi sa Basak, San Nicolas,” butyag ni Natnat.

Si Miña manganakay na karong Agusto sa ikaduha nilang liwat ug “werpa” nila ning i-welcome kay sayod sila nga “petmalu” ug “sakalam” na sila sa mga responsibilidad isip mga ginikanan. Laysho!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph