GIBAWIAN sa iyang kinabuhi sulod sa Vicente Sotto Memorial Medical Center (VSMMC) ang usa ka drug surrenderer nga gipusil samtang nag-ayo sa iyang motorsiklo sa Martes, Hulyo 20, sa Barangay Lusaran, bukirang dapit sa Siyudad sa Sugbo.
Hinuon, nakasulti pa ang biktima kinsa ang nipusil kaniya.
Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO), nga nigrabe ang kahimtang ni Jayson Goc-ong gumikan sa samad sa ulo.
Nailhan sa mga imbestigador ang gunman, apan wala lang una nila nganli tungod kay nagpadayon pa ang ilang hot pursuit operation batok sa suspek
Apan gibutyag ni Parilla nga panimawos ang motibo sa krimen sanglit sa miaging semana, adunay gikaaway si Goc-ong nga iya pang gitionan sa iyang armas.
Apan wala matino sa kapulisan kom unsay hinungdan sa ilang away.
Wa damha ni Goc-ong nga balikan niini tungod kay nakaila usab siya sa namusil kaniya.
Dugang niya nga nagpuyo ra usab sa barangay ang suspek sanglit nasuheto sa dapit kon asa moagi aron mosibat.
Gani nakita pa nila ang mga tunob niini.
Gihulagway ni Parilla ang gunman nga adunay kapasidad nga mopatay tungod kay aduna na usab kini record sa barangay ug sa kapulisan.
Giingong makasulti pa si Goc-ong sa dihang nadala sa North General Hospital sa Brangay Talamban una gibalhin sa VSMMC diin siya nabugtoan sa kinabuhi. (AYB)