SUPERBALITA CEBU

Mayor sa Tabogon gireklamo sa Ombud; pasangil gihimakak

GIREKLAMO sa Office of the Ombudsman for the Visayas ang mayor sa Lungsod sa Tabogon tungod sa giingong pagabuso sa gahom ug paggamit sa pundo sa kagamhanan sa personal nga katuyoan.

Ang reklamo gipasaka ni Regie Ornopia batok kang Tabogon Mayor Zigfred Duterte.

Sumala sa reklamo ni Ornopia, gikuhasiya isip drayber sa munisipyo sa Tabogon niadtong 2014 apan, giingong gisugo sa mayor kaniya sa pag-drive sa dumptruck nga may kalabutan sa negosyo sa mayor ug paghatod sa iyang mga anak sa tunghaan samtang ang munisipyo maoy nagsuhol kaniya.

“Sa sugod, usa ko ka personal driver ni Mayor Duterte pero atong tuig 2014, gi-assign nako pag-drive og dump truck nga personal nga gipanag-iya ni Mayor Duterte,” saysay ni Ornopia.

“Pasabot nako ani nga bisan pa ang nagsuweldo nako kay ang munisipyo sa Tabogon, Cebu Province ako trabaho ang pag-drive sa iyang mga anak gikan sa ilang balay sa Lamac, Consolacion, Cebu padung sa eskwelahan ug niserbisyo ko isip driver sa asawa ni Mayor Duterte sa iyang personal nga transactions,” dugang sa reklamo ni Ornopia.

Gipasabot ni Ornopia nga gihimo usab siya nga driver sa dumptruck ug maoy moduma sa limestone hauling ug quarry nga negosyo sa mayor, bisan pa niini, anaa gihapon siya sa payroll sa munisipyo.

Sa panahon nga siya pa maoy mo-drive sa dumptrucks sa mayor giingong adto kini patubilan sa MHDA Gasoline Station sa Barangay Piyo nga maoy gikontrata sa munisipyo ubos sa credit term basi alang sa pagtubil sa mga sakyanan nga iya sa lungsod.

“Ang krudo nga gitubil sa dumptrucks gi-charge na sa munisipyo ug ang gas voucher ana gisubmitar naa gibutang ug gigamit lang ang plate number sa mga karaang dumptrucks sa munisipyo nga wala na mag dagan,” matod ni Ornopia.

Ni-resign na hinuon si Ornopia human giingong gipasanginlan siya sa mayor sa pagpamaligya og limestone sa iyang mga kustomer.

Gihimakak sa mayor

Giangkon sa mayor nga lima ka tuig ang milabay nahimo niining drayber si Ornopia sa munisipyo apan gihimakak niini ang mga pasangil batok kaniya.

“Oo, driver ko na way back four years or five years ago ba dugay na kaayo. Dili na tinuod kay sauna ang storya ani. Driver ni siya sa munisipyo wa mani siya nako. Kung ingon ka ug petsa naa man gyud na ang petsa gyud unya ikduha naa pod na siyay DTR sa munisipyo kana siya,” matod ni Duterte sa Hulyo 21.

Giangkon sa Mayor nga aduna siyay negosyong hauling apan iyang gilimod ang pasangil nga ang kwarta sa munisipyo maoa gigamit sa pagtubil sa dumptrucks niini.

“Lahi mana, Ma’am, kay naa man tay mga resibo ana nga agdon sa atong payments sa atong negosyo sa atong kaugalingon naa man gyud tay gas station nga suki nga lahi gyud. Lahi sa munisipyo, lahi sad ang gasolinahan naa manay mga resibo,” matod sa mayor.

Giklaro usab niya nga ang iyang mga anak wala sa magpuyo sa Consolacion apan anaa kini nagpuyo sa Siyudad sa Sugbo.

Giingong wala pa madawat ni Duterte ang kopya sa complaint apan giingong andam siya nga tubagon ang mga pasangil batok kaniya.

Nipasalig si Duterte nga dili i-tolerate sa kagamhanan ang pagpahimos sa gahom ug kwarta sa lungsod.

Nagtuo hinuon siya nga dunay mga politiko nga nagpaluyo sa nigawas nga isyu ilabi na nga naghinangat na ang piniliay sa 2022.

“Hibung lang ko nga how many years karon ra na. Paminaw nako, duda ko ana naay politika ana nga nagpahipi. Kahibaw na baya ka nga padung na ang eleksyon,” pagduda sa mayor. (ANV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph