SUPERBALITA CEBU

Central Visayas nakadawat og doses sa Johnson; usa ra ka dose gikinahanglan

SECOND DOSE. Nagpadayon ang pagpamakuna sa ikaduhang dose sa Sinovac vaccine nga gipahigayon sa Mega Vaccination Center sa Noah Complex sa South Road Properties ( SRP) sa Miyer­kules, Hulyo 21, 2021. (Amper Campaña)

ANG Visayas Covid-19 Vaccination Operations Center (VVOC), sa Miyerkules, Hulyo 21, 2021, nipahibawo nga ang rehiyon nakadawat og unang batch sa Johnson & Johnson vaccine, nga gigama sa Janssen Pharmaceutical companies, sa Lunes, Hulyo 19.

Si Dr. Mary Jean Loreche, VVOC spokesperson, niingon nga 96,450 ka doses sa Johnson & Johnson kun Janssen vaccine kinatibuk-ang nahatod sa rehiyon sa Lunes.

Sa pagkakaron, ang Central Visayas nakadawat og kinatibuk-ang 1,307,580 ka doses sa nagsagol nga Covid-19 vaccine sukad gisugdan ang rollout.

Kini gilangkuban sa 610,640 ka doses sa Sinovac; 347,600 doses sa AstraZeneca vaccine; 241,020 ka doses sa Pfizer; 10,700 doses sa Gamaleya, ug labing uwahi ang 96,450 ka doses of Janssen vaccine.

Ang Cebu City Government nakadawat og laing 6,000 ka doses sa Sinovac ug 2,970 vials sa Johnson and Johnson.

Gamiton kini alang sa first dose, matod ni Dr. Jeffrey Ibones, pangulo sa Cebu City Health Department (CCHD).

Ang mga bakuna niabot sa Miyerkules, Hulyo 21, 2021 gikan sa DOH.

Si Ibones nagkanayon nga prayoridad nila sa maong bakuna mao ang vaccination site sa Ayala Center Cebu sanglit alang kini sa first dose.

Gitumong kini aron di magdasok ang mga tawo sa vaccination sites kay sagad kanila nag-atiman para sa 2nd dose.

Ang pangulo sa CCHD nagkanayon nga ang usa ka vial sa J and J makabakuna og lima ka mga tawo. Wa na usab kinahanglana ang second dose.

Si Konsehal Dave Tumulak nidasig ngadto sa mga senior citizen ug mga miyembro sa panimalay nga magparehistro.

“Gihangyo ang pamilya sa mga senior citizens dinhi sa siyudad nga ilang iparehistro online ang ilang lolo ug lola, mama ug papa nga mga senior citizens nga gusto magpabakuna,” padayag ni Tumulak.

Alang sa senior

Ang Mandaue City ug Lapu-Lapu City nga nakadawat usab sa bakuna nga J&J mogamit niini alang lamang sa ilang senior citizens.

Ang Mandaue City nakadawat nakadawat og 11,250 doses sa Hulyoy 20, 2021, nga ibakuna lang alang sa senior citizens.

Si Mandaue City Emergency Operations Center (EOC) head August Lizer Malate niingon nga ang doses ila lang idapat ngadto sa senior citizens nga ipahigayon lang sa Mandaue City Cultural and Sports Complex.

Di sila angay nga mabalaka sa linya kay dunay itagana kanilang priority lane sa Sports Complex.

Matod ni Malate nga ilang gituyo nga ang J&J maoy ilang gigamit alang sa senior citizens kay wa kini second dose. (PAC, KFD, GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph