DUHA ang patay ug duha ang nangaangol, usa ka nila kritikal, sa managlahing mga aksidente sa dan sa Sugbo.
Namatay ang usa ka kundoktor human malabay uban sa iyang motorsiklo dihang nabangga sa sakyanan sa usa ka sakop sa Philippine Air Force (PAF) alas 7:50 sa gabii sa Martes, Hulyo 20, 2021 sa national highway sa Barangay Guiwanon, lungsod sa Barili.
Si Ernesto Emactao, 45, minyo, taga Barangay Tubod, lungsud sa Barili, kondoktor sa Chan mini bus namatay sa tambalanan sa Barili tungod sa grabeng sa iyang lawas.
Samtang gi-release sa kapulisan si First Liuetenant Berdito Layan, 30, nakabase sa Mactan-General Benito Ebuen Air Base, apan lumad nga taga Sitio Sambag, Barangay Bitoon, lungsud sa Dumanjug.
Sila si Layan ug mga kabanay ni Emactao nagkasabot human sa insidente nga abagahon sa airman ang gastuhan sa pagpahiluna sa lawas.
Si Police Staff Sgt. Dindo Papelona sa Barili Police Station nga nahinabi sa Superbalita Cebu nagkanayon nga si Emactao nagsakay sa iyang motorsiklo padulong mopauli sa ilang balay sa Barangay Tubod, Barili.
Si Layan nag-una ug pag-abot sa nahisgutang lugar, nipadaplin kay ni-u-turn aron maka-parking sa balay sa iyang higala.
Pero akto sab nga kusog ang dagan ni Emactao nga nagmotorsiklo, wa dayon makabantay sa pag-u-turn sa awto hinungdan nga siya nabangga.
Sa kakusog sa impact, nalabay si Emactao ug motorsiklo.
Nianang alas 11 sa buntag, namatay ang usa ka lola human nadasmagan sa motorsiklo sa Barangay Gunting.
Si Narcisa Gako, 64, minyo, taga Brgy. Gunting, namatay usab sa tambalanan.
Si Jojo Beronio Indab, 29, dunay kapuyo taga Barangay Balao, lungsud sa Barili, nga maoy nakadasmag kang Gako gibilanggo unta apan gibuhian human nagkasinabot tali sa banay.
Si Major Romeo Caacoy Jr., hepe sa Barili Police Station, nga nahinabi sa Superbalita Cebu, nagkanayon si Indab gikan sa ilang panimalay sa motorsiklo padulong sa Barangay Poblacion.
Pag-abot niya sa nahisgutang dapit, kalit lang nilabang sa dan gikan sa gym sa barangay hinungdan nga nadasmagan ni Indab.
Matod ni Caacoy nga si Indab nisaad nga abagahon ang gastuhan sa pagpahiluna lawas.
San Fernando
Samtang patay sab ang usa ka security guard ug naangol iyang mabdos nga uyab human sila na hit-and-run sa usa ka dumptruck alas 11 sa gabii sa Martes, Hulyo 20, 2021 sa national highway sa Brgy. Balod, lungsod sa San Fernando.
Ang biktima giila sa kapulisan nga si Marionito Caballero, 31, buwag sa asawa, taga Brgy. Balot, lungsod sa Sibonga.
Naangol sab ang iyang uyab nga si Marilyn Bacarisas, 26, ulitawo, taga Barangay Lamacan, lungsod sa Sibonga.
Si Police Senior Master Sgt. Marvin Ando, imbestigador sa San Fernando Police Station nga nahinabi sa Superbalita Cebu, nagkanayon nga sila si Caballero ug Bacarisas padulong mopauli.
Ang dumptruck nga ni-hit and run padulong sa dakbayan sa Sugbo, ni-overtake sa laing sakyanan ug nisulod sa dili na niya lane.
Akto sab nga gikasugat ang mga biktima ug nadasmagan, nangalagpot gikan sa ilang gisakyang motorsiklo.
Inay mohunong, nipasutoy sa pagpadagan ang driver, gibiyaan ang mga biktima.
Nailhan
Hinuon, si Ando nipahibawo sa Superbalita Cebu nga nailhan na ang truck driver.
Ang driver mao si Rocendo Maliza, 50, minyo, taga Barangay Yati, lungsod sa Liloan.
Matod ni Ando nga ang tag-iya sa truck nga si Orlando Dino, taga Tisa, Dakbayan sa Sugbo, maoy nipahibawo kanila nga motahan si Maliza.
Nipasabot si Dino nga wa mohunong si Maliza tungod sa kahadlok sa hitabo hinungdan nga nidiretso sa pagpauli.
Nagkurog kining nisulti kaniya nga siya nakadasmag ug iyang gibiyaan.
Si Dino nakigsulti na sa mga kabanay sa mga biktima.