SUPERBALITA CEBU

‘Bulabog’ kada adlaw

OPLAN Bulabog sa Cebu City Police Office (CCPO) gihimo nang kada adlaw tungod sa pagsulbong og balik sa mga kaso sa coronavirus disease 2019 (Covid-19) sa milabayng mga adlaw.

Pila na ka adlaw ang adlaw nga mosobra na sa 100 ang matala nga positibo sa Covid 19 sa dakbayan.

Tungod niini, mas pahugtan pa sa kapulisan ang pagpatuman sa minimum health standard aron mapugngan ang pagkatap pa sa Covid-19.

Matod ni Police Lieutenant Colonel Wilbert Parilla, deputy city director for operations, nga kon kaniadto matag weekend lang himuon ang Oplan Bulabog, sugod niadtong Lunes, Hulyo 19, gihimo na kini kada adlaw.

Ilang tumong aron ang publiko mosunod sa mga health protocol, sama sa kanunay nga pag sul-ob sa ilang mask ug ang social distancing.

“Karon, wala na tay giila nga weekend. Basta starting last Monday, July 19, 2021, continuous ang atong Oplan Bulabog,” matod ni Parilla.

Sa mga buwan nga nanglabay, ang kapulisan mohimo lang og Oplan Bulabog matag weekend pinaagi sa pagbisita sa mga imnanan.

Ang kapulisan ubanan sa mga kawani ug opisyal sa Dakbayan sa Sugbo nga mopahamtang og multa sa mga makalapas sa curfew ug uban pang mga executive order ni Mayor Edgardo Labella.

Ang mga establisemento nga nakalapas gipadad-an og show cause order.

Ang labing uwahi nga nasakpan mao ang usa ka resto-bar sa condominium nga naabtang nagpainom sa ilang mga kustomer lapas na sa tungang gabii, diin labing minos 120 ang nadakpan sa kapulisan ug sa Prevention, Restoration, Order, Beautification, and Enhancement (Probe).

Sama sa gihapon, ang Barangay Guadalupe nag-una nga adunay labing daghan nga mga kaso sa Covid-19. Hinuon, ang barangay maoy dunay labing taas og populasyon nga naa sa 70,000 kapin base sa 2020 nga census.

Tungod niini, gipatutukan kini karon sa kapulisan pinaagi sa pagbantay sa mga sitio nga adunay daghang kaso.

Gitug-an ni Parilla nga sa pagkakaron, way granular lockdown, apan adunay usa ka dapit nga gipabantayan sa mga barangay tanod inabagan sa kapulisan aron ang mga close contact sa mga nagpositibo di makagawas-gawas samtang gipaubos sila sa isolation sulod sa ilang tagsa-tagsa ka panimalay.

Bisan pa niini, way idugang nga personnel ang CCPO sa Guadalupe Police Station sanglit mahimo ra nila ang pag bantay.

“So far duna silay usa ka sitio nga medyo taas-taas nga maoy gipang isolate ang mga close contact kay ang mga positive na extract na man. So, kining nahabilin ron more on close contact nalang ni sila,” pasabot ni Parilla.

Gipasalig usab sa kapulisan nga naa pa ang ilang contact tracers nga gibahin sa lima ka teams hinungdan nga dali ra masubay ang ang mga close contact sa mga natakbuyan sa Covid-19.

Iyang giawhag ang publiko nga magmatngon kanunay, mosunod sa mga health protocol aron di mabalik sa mas estriktong quarantine status.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph