IPAUBOS sa lockdown ang pito ka mga barangay sa lungsod sa Samboan sugod karon, Hulyo 23, hangtod sa Hulyo 28, Miyerkules, tungod sa nagpadayon nga pagsaka sa kaso sa Covid-19.
Nakahuom ang lokal nga kagamhanan nga limitahan ang lihok sa mga tawo.
Subay sa giluwatan nga Executive Order 25 ni Samboan Mayor Emerito Caldero Jr., ipaubos sa lockdown ang Barangay Bato, Bonbon, Colase, Suba, Dalahikan, Poblacion ug Tangbo.
Sa kamandoan, dili pwede nga makalugsong o masulod ang mga residente gikan sa bukirang barangay sa sentro sa lungsod ug ngadto sa coastal areas.
Dili una pwede mobukas ang mga establisimento gawas sa pharmacy, remittance center ug convenience stores.
Walay mobukas nga tourism sites, sirad-an una ang mga simbahan ug dili una pwede mopahigayon og misa.
Sirad-an usab ang merkado ug mga kan-anan.
Sama sa panahon nga gipaubos sa enhanced community quarantine (ECQ) ang nasud, gidili ang sports activities ug non-essential travels.
Dili usab pwede ang pagpahigayon og kasal, bunyag ug uban pang mga kalihukan.
Mipasalig ang kagamhanan nga adunay ayuda sa pagkaon ug tambal nga iapud-apod alang sa mga apektadong residente sa lungsod.
Ang kapulisan gitahasan sa pag-monitor sa mga residente alang sa hapsay nga pagpatuman niini.
Sa update sa Rural Health Unit, moabot sa 24 ang natala nga aktibong kaso sa lungsod.
Nanawagan ang kagamhanan sa lungsod sa pagsunod sa tanan nga lagda aron malikayan ang pagtakod sa Covid-19 sa uban. (ANV)