Ni Alcea Maningo
Cangyan, Carmen, Cebu
SA BALAY ni Denver sa Mandag-um dunay Bible Study nga pagahimuon matag adlawng Sabado. Alas sayis sa hapon magsugod ug mohangtod sa alas siyete sa gabii. Si Pastor Jason Tabla sa Good Shepherd Ministry maoy lecturer.
Atol nga nakabisita si Rudy, maguwang ni Denver, nga usa ka pastor sa True Religion Assembly. Gipasulti si Rudy. Nakuryuso si Jason kon unsay mga doktrina nga ikapamahin ni Rudy sulod sa 40 anyos nga pagtuon sa Bibliya.
“Wala ako magsangyaw og doktrina. Akong gisangyaw ang Biblical Truth, mga kamatuoran gikan sa Bibliya nga dili matuis. Ang doktrina tinuis na kana gikan sa mga bersikulo sa Bibliya,” ni Rudy. Diha siya maglingkod sa habagatang habig sa cottage ni Denver.
Daghan ang nanambong sa Bible Study karon, maong ania kini himoa sa cottage kay dakog lugar. Naminaw ang 20 ka tawo uban sa mga suod sa kinabuhi ni Denver. Diha ang iyang mga maguwang nga sila si Maria, Edith, Diogene, ug Dennis. Diha si Raquel, asawa ni Denver, ug ang ilang mga anak, sila si Kate ug Karyll. Diha sab si Reinelle, asawa ni Dennis, ug ang ilang mga anak nga sila si Samantha ug Kelly. Diha si Mira, asawa ni Rudy, ug mga klasmeyt ni Mira nga sila si Marilou, Cornelia, Melona, Bebe, Odet, Betchy, Anghelo, Estong ug Jose.
Mipadayon si Rudy pagpamulong, “Nasaysay na nako ang tinuod nga relihiyon, ang tinuod nga Diyos ug ang tinuod nga kamatuoran gikan ni Jesus. Aron mahimong mabulukon kining atong Bible Study, gusto kong motubag sa mga pangutana gikan ninyo nga naminaw karon!” “Unsa may mga kalihukan sa tinuod nga relihiyon?” ni Jason nga naglingkod sa tuo ni Rudy. Nangita siyag katin-awan o namasin nga masipyat iyang karibal nga pastor.
“Ang tinuod nga relihiyon magasulbad sa kapobre sa kalibutan ug magmintinar sa katarong ug kalimpyo sa katawhan,” ni Rudy. “Ang tinuod nga relihiyon dili manguwarta. Ako, gikan sa Lunes hangtod sa Biyernes nanarbaho ko. Kay retirado ko nga abogado, duna koy gamayng pensyon. Hinuon, makakuwarta gihapon kog ginagmay kon may mangunsulta ug magpahimo og dokumento. Sa Sabado ug Dominggo magsangyaw ko nga libre. Kon dunay gusto mohatag nakog kuwarta, ako silang ingnon nga ihatag lang na sa labing ubos sa inyong paryente, silingan o higala. Kon naa gyuy mohatag og kuwarta sa akong relihiyon, adto kini padung sa mga pobreng tabangunon nga akong nailhan.” Nangyamiid ug unya miduko si Jason. “Sa pagkakaron nagkadaghan ang mga relihiyon, apan daghan gihapon ang mga pobre. Ngano man ni?” gikan ni Denver.
“Tungod kay way laing tinuod nga relihiyon, gawas sa akoa nga mao ray tinuod,” ni Rudy. “Ang tanang mo-alagad sa tinuod nga relihiyon mo-alagad nga boluntaryo. Way giapas nga suweldo. Sila mo-sakripisyo tungod sa gugma sa Diyos ug sa isigka tawo.”
“Unsa may gusto nimong usbon sa Bibliya?” ni Jason nga miyahat pagtan-aw kang Rudy. “Ang mga suwat ni Paul angay papason sa Bibliya. Kon dili bakak, puro kini mensahe sa pagpakaaron-ingnon,” ni Rudy. “Ang sayop nga paggamit sa Bibliya angay korehian. Kausa ra namatay si Jesus. Kausa ra Siya nabanhaw ug tua na Siya sa langit. Dili nato gamiton ang Bibliya sa pagpangilad. Ang kalibutan sa panahon ni Jesus lahi kaysa karon human molabay ang dos mil ka tuig. Dili nato ipakatap nga si Jesus namatay tungod sa atong sala. O ang atong sala gibayran sa kamatayon ni Jesus. Kana maoy dakong panamastamas sa Bibliya. Ang kamatayon ug pagkabanhaw ni Jesus usa ka historical truth. Ang iyang pagtulun-an nga gibilin maoy usa ka eternal truth. Ang mga pagtulun-an ni Jesus maoy atong tun-an aron matarong atong kinabuhi.
Apan dakong bakak o ilad ang pag-ingon nga si Jesus nagpakamatay tungod sa atong sala. Angay nang wad-on ang pagpangilad sa tawo pinaagi sa Bibliya. Mobasa ta sa Bibliya pero bantayan nato ang mga katuigang nanglabay!” Nakapanglab-ok og laway si Jason. Dako ang iyang pagbasol nganong gipasulti pa si Rudy. Dakog puruhan nga mawad-an na siyag panguwarta. (Katapusan)