LAIN na sab nga high profile nga pagpatay ang nahitabo dinhi sa Sugbo. Human sa iyang radio program sa sibyaanang dyRB sa Huwebes sa buntag, gipusil patay si radio blocktimer Rey Cortes sa wa pa mailhing gunman.
Nailhan si Cortes nga hard-hitting nga komentarista nga way gipili basta sawayunon, iya kining atakihon. Sa iyang trabaho, nakahimo to siya og daghang mga kaaway. Gani, siya ug iyang pamilya mismo nakadawat og mga hulga sa ilang kinabuhi.
Mao ni ang makapalisod sa imbestigasyon sa kapulisan tungod kay daghang mga tawo ang iyang napasakitan sa mga komentaryo. Labing seguro nga una gyud nga anggulo nga subayon sa kapulisan mao ang iyang trabaho. Apan labing lisod sa imbestigasyon mao ang kadaghan sa subayon.
Kon naglisod pagsulbad ang kapulisan sa ubang high-profile nga mga kaso, dako ang kahigayunan nga sama sa uban, di gihapon kini masulbad. Kutob ra sa person of interest, wa na moirog pa ang imbestigasyon. kay kuno way kooperasyon sa pamilya ug saksi. Labina gyud niining mga kaso sa pagpatay nga sama sa kang Cortes.
Bisan pa sa kadaghan sa nasuko kaniya, buhat man sa kapulisan ang pag-imbestigar sa bisan unsa nga matang sa krimen, labina sa usa ka media practitioner bisan kon siya usa ka radio blocktimer, kinahanglan ila ning susihon.
Bitaw kon trabahuon lang sa pulis ang pag-imbestigar sa mga kaso, wa may krimen nga di masulbad. Namatud-an na ni sa ubang mga kaso nga gidangop sa National Bureau of Investigation (NBI) nga nasulbad, sama sa pagpatay sa usa ka abogado. Paspas kaayong nakakuha og mga ebidensya, naunhan pa ang mga pulis sa ilang pagsikop ug nakapasaka pag kaso.
Nasulbad sa NBI ang kaso kay ilang gitutokan og maayo. Hinaut masulbad dayon kining kaso ni Cortes kay ang pagpatay sa usa ka komentarista, blocktimer man o di, usa ka pagpangatake sa kagawasan sa pagpadayag.