BLOCKTIMER sa radyo gipusil patay sa gituohang sniper human sa iyang programa sa dihang padung na unta mosakay sa iyang sakyanan aron mopauli mga alas 8:50 sa Huwebes sa buntag, Hulyo 22, 2021 sa Natalio Bacalso Avenue, Barangay Mambaling, Dakbayan sa Sugbo.
Ang biktima nga si Reynante “Rey” Cortes, 45, gihulagway nga hard-hitting nga komentarista, namatay sa Cebu City Medical Center (CCM) diin siya gidala sa driver ni Cebu City Councilor Dave Tumulak.
Matod ni Police Major Dindo Alaras, hepe sa Mambaling Police Station, nga ilang subayon ang mga kuha sa closed circuit television (CCTV) camera tungod kay way bisan usa ang nakakita kinsa ang namusil.
Nahinabi ni Alaras ang close-in bodyguard ug driver ni Cortes nga si Felix Booc.
Sulti ni Booc nga sa dihang padung mosakay ang iyang amo, usa ka lanog nga buto sa armas ang ilang nadunggan dayon nahagba na ang magsisibya.
Wala sila masayod kon diin gikan ang buto ug wa usab silay nabantayan nga adunay sakyanan nga mipahilayo sa dapit sama sa motorsiklo nga kasagaran gamiton sa riding in tandem.
Gituohan nila nga layo rang gunman hinungdan nga nagtuo silang sniper ang killer.
“However, according sa close in ni Sir Rey, kini si Felix Booc wala gyud sila nakakita kon asa gikan ang buto. Basta nakadungog silag buto nya natumba na si sir Rey,” matod ni Alaras.
Si Cortes naigo sa bukton ug ang bala nilapos sa dughan gikan sa armas nga wa pa matino ang matang ug kalibre.
Si Tumulak, kinsa nisunod sa programa ni Cortes, nitug-an nga buhi pa nga gidala sa iyang driver ang biktima paingon sa CCMC apan naa na kini sa kritikal nga kondisyon.
Sa interbyu sa Superbalita Cebu, si Tumulak niingon nga mga alas 8:30 sa buntag nagkaabot pa sila ni Cortes kay nag-una ang programa.
Mga alas 8:57 dunay nisaka nga tawo nga nipahibawo kaniya nga gipusil si Cortes hinungdan nga iyang gimandoan ang iyang driver sa pagdala kang Cortes sa ospital.
Iyang gimandoan si Cortes sa di pag-utong aron di mosamot pag-agas ang daghang dugo.
Pagka alas 9:55 sa buntag gideklara sa doctor nga nabugto-an sa gininhawa ang magsisibya tungod sa kadaot nga naangkon niini sa iyang sulod sa lawas.
Hulga
Nitug-an si Booc sa mga imbestigador nga daghan og kaaway si Cortes tungod kay naigo sa komentaryo niini sa radyo.
Sigun ni Alaras nga ilang tagsa-tagsaon sa pag subay kon kinsa kining mga personalidad nga giingong gikakontra ni Cortes aron didto sila magsugod sa imbestigasyon.
Ang Cebu City Police Office miumol dayon og Special Investigation Task Group (SITG) aron maoy motutuk sa kamatayon ni Cortes.
Matod ni Police Lieutenant Colonel Wilbert Parilla, deputy city director for operations, maglangkob sa SITG mao ang Mambaling police station, Investigation Section sa CCPO, Criminal Investigation and Detection Group (CIDG) 7 ug PNP Crime Laboratory.
“As per directive by our city director, the Station 11 commander was directed to request for the creation of SITG considering that the victim Rey Cortes is a media personality,” matod ni Parilla.
Si Cortes ang ika 14 sa 15 nga gipusil sulod lang ning buwana nga natala sa kapulisan sa siyudad sa sugbo.
Samtang si Kit Matus-Cortes, asawa ni Rey, nikompirmar nga daghan kaayo sila og mga hulga nga dawat.
“Daghang kaayo mig hulga sa mi-aging tuig pa, kami daw tibuok pamilya patyon, naay mga trolls sa social media, ako, akong mga anak makadawat sab,” dugang ni Cortes.
Gipanghinaot ni Kit nga mahatagan og hustisya ang kamatayon sa iyang bana.