DAKO ang kalipay bisan pa man sa nahitabo human nakadawat og ayuda gikan sa Davao City First Congressional District Office ang mga nasunogan sa Punta Dumalag 1, Barangay Matina Aplaya niadtong Hulyo 21, 2021.

Dungan sa cash assistance gitunol sab sa mga staff ni Davao City First District Congressman Paolo Duterte ang tagsa ka sako nga dunay unod nga tag 10 kilos nga bugas ug canned goods.

Moihap sa 141 ka mga house owners, walo ka mga sharers, 16 ka mga renters ug usa ka boarder ang nasunogan sa dapit subay sa ihap gikan sa City Social Welfare and Development Office (CSWDO).

Sa maong ihap, 34 ka mga pamilya ang apektado nga anaa mitiner sa Barangay Matina Aplaya, ang 57 ka pamilya naa sa Alpha San Lorenzo, moihap sab sa 37 ka pamilya sa Shanghai Gym ug 13 ka pamilya sa Dumalag 3 Gym.

Gawas ni Rep. Duterte, nanghatag sab og ayuda si Senador Bong Go sa miaging adlaw.

Naa sab mga indibiduwal ug mga grupo nga mipaabot sa ilang tabang diha sa pagdalit og mga pagkaon nga gilangkuban sa mga bugas ug delata.

Ginaproseso na sab sa CSWDO ang paghatag og ayudang pinansiyal sa mga nasunogan. (Jeepy P. Compio)