NADAKPAN sa Joint Task Force Central ang usa ka bayong-bayong nga lalaki nga giingong nagdala og daghang mga armas alas 2 sa hapon, Miyerkules, Hulyo 21, sa probinsiya sa Maguindanao.
Giila ang suspek nga si alyas Tato, nagpuyo sa Barangay Bialong, Shariff Aguak sa maong probinsiya.
Gibutyag ni 1st Mechanized Battalion Commander Lieutenant Colonel Cresencio Sanchez Jr. nga miagi sa military checkpoint sa Barangay Nabundas sa maong lungsod ang menor nga nagmaneho og kuliglig o tractor.
Sumala pa nga kadudahan ang panglihok niini ug buot pa unta nga molikay sa mga sundalo.
Nakuha sulod sa kuliglig o tractor ang usa ka M16 (Bushmaster), usa ka M16 fifle, 38 ka buok sa M16 barrels, unom ka buok M14 back plate, duha ka buok M16 butt plates, nagkadaiyang parte sa M14 ug M16 rifles, usa ka yunit sa welding machine, ug tulo ka buok metal clamp.
Ang suspek daling giduso sa mga sundalo ngadto sa kapulisan gumikan kay menor de edad ug giimbestigahan.
Dako ang pagtuo ni Sanchez nga gipanag-iyahan sa Bangsamoro Islamic Freedom Fighters ang mga armas o kaha mga Armed Lawless Group.
Samtang gidayeg ni 6th Infantry (Kampilan) Chief ug Joint Task Force Central Commander Major General Juvymax Uy ang puwersa sa 1st Mechanized Battalion ug mga intel units sa pagkasikop sa menor ug pagkarekober sa mga armas.