PIPILA ka adlaw sa dili pa ang iyang away sa Tokyo Olympics, usa ka mensahe nga naghatag og dakong inspirasyon sa iyang kampanya ang nadawat ni Eumir Marcial, kinsa usa sa lig-ong mga prospect nga maka-gold medal sa matag upat ka tuig nga kompetisyon.
Ang mensahe nga adunay pataban nga usa ka Bersikulo sa Bibliya gikan mismo ni eight-time division champion ug Senador Manny Pacquiao, kinsa usa ka relihiyuso.
Pinaagi sa ilang online conversation, gidasig ni Pacquiao si Marcial sa iyang umaabot nga mga away kay mao na kini ang iyang higayon nga makatunol sa labing unang gold medal alang sa Pilipinas.
“Pagbutihan mo, this is our time, this is your time. Ipakita mo yung galing mo. Just focus lang, wag kang mag-over confident. Kailangan focus ka, concentrate ka,” pahimangno ni Pacquiao ngadto ni Marcial.
Sa kasamtangan, si Pacquiao nag-training sa Estados Unidos alang sa iyang away batok ni Errol Spence karong Agusto 21, 2021 Las Vegas, Nevada.
Apan sa wala pa motapos ang ilang sinukliay sa mga pulong nga puno sa panghinaot ug pangaliya, si Marcial mihangyo sa senador sa pagpasawo og usa ka Bersikulo sa Biblia nga sa iyang dakong pagtuo makadugang sa determinasyon ug inspirasyon sa sa iyang kalampusan.
“Senator basin duna kay Bible Verse nga mahatag nako senador,” ni Marcil pa. Niini daling gisanong ni Pacquiao ang hangyo ni Marcial pinaagi sa yanong pagbatbat niini.
“Okey Bible Verse Isiah 41:10. Fear thou not; for I am with thee: be not dismayed; for I am thy God: I will strengthen thee; yea, I will help thee; yea, I will uphold thee with the right hand of my righteousness. ... 13 For I the Lord thy God will hold thy right hand, saying unto thee, Fear not; I will help thee,” saysay ni Pacquiao.
Ang pagpasalamat ni Marcial ngadto ni Pacquiao maoy mitapos sa ilang hinabi. “Salamat, Senador,” matod ni Marcial kinsa gikatakdang mopakita og aksiyon sa Miyerkules, Hulyo 28 sa men’s middleweight division.