SA WALA damha, ang Iligan Archangels ni-back out sa nagpadayon nga 2021 Chooks-to-Go Pilipinas VisMin Super Cup niadtong Hulyo 22, 2021.
Kini maoy gipahibawo ni Chelito Caro, head sa basketball operations sa lega, atol sa Zoom meeting sa team representatives.
“Team Iligan already backed out from the Mindanao Leg. There was an internal problem and they decided to pull out,” unod sa minutes of the meeting nga gipirmahan ni Rocky Chan, ang chief operation officer sa lega.
Ang Archangels wala’y daog sulod sa lima ka mga duwa ug mao ang nangiwit sa standings.
Sa kalit nga pagkawagtang sa Iligan, ang tanan nilang duwa i-forfeit pabor sa ilang kontra ug niini, ang nahabiling walo ka teams nakaseguro na og luna alang sa playoffs nga sugdan sa Hulyo 29.
“‘Yung remaining games ng Iligan, considered as winner na ‘yung opponent,” pasabot ni Caro.
Tungod ning kalamboan, lima na lang ka mga adlaw ang nahabilin sa elimination round ug nausab ang kasamtangang rankings.
Ang Iligan City team gipanag-iya ni Mayor Celso Regencia ug ubos sa pag-coach ni Dane Lariosa. (JBM)