Casimero, 80% pa: trainer

KON tan-awon sa video, impresibo kaayo ang gipakita ni World Boxing Organization (WBO) bantamweight champion Johnriel Casimero sa iyang ensayo.

Pero alang sa iyang trainer nga si Nonoy Neri di pa gyud ni mao ug anaa pa lang sa 80 porsiyento ang iyang pagpangandam sa di pa niya ikasangka si kanhi world champion Guillermo Rigondeaux karong Agusto 14, 2021 sa Carson, California.

Gibutyag ni Neri sa usa ka TV interview nga anaa na ang kusog ni Casimero apan ang iyang kaabtik ug kalangas ibabaw sa ring wala pa gyud mahingpit.

Gipasabot ni Neri nga dali ra kining makuha sa iyang batos tungod sa subsob nga training niini aron madepensaan ang iyang kampyunato sa Dignity Health Sports Park.

Samtang magkaduol na ang petsa sa away, matod ni Neri, nga magkagaan na usab ang training niini ug ning higayuna hinayhinay na usab nga maka-recover ang iyang lawas sa naandan nga kaabtik.

Si Neri kinsa usa usab sa nitabang karon sa training ni Manny Pacquiao, nagtuo nga ang kaabtik ug kusog maoy magyawe sa kadaugan ni Casimero.

Bisan tuod og sa niaging semana pa siya nakasugod pag-training ni Casimero isip puli sa laing trainer nga si Jorge Capetillo, nanglantaw si Neri nga labing taas unom lang ka rounds si Rigondeaux.

Si Capetillo, kinsa maoy nanag-iya sa gym diin nag-training si Casimero sa Las Vegas, anaa na usab karon sa Los Angeles aron moabag ni Neri.

Nakuyog usab ang conditioning coach sa lumad nga taga Ormoc City nga si Memo Heredia aron pagseguro nga makuha ang 118 lbs. nga timbang ni Casimero.

Ang Team Casimero ni-release na sa resulta sa iyang Voluntary Anti-Doping Association (Vada) niadtong Hulyo 16, 2021 nga nagpamatuod nga wala siya naggamit og performance-enhancing substances human sa preliminary testing. (JBM)