DAGHAN ang nakadayeg niining usa ka amahan gikan sa China nga way hunong sa pagpangita sa iyang anak human kini gikidnap niadtong 1990s.
Way hunong iyang pagmotor sa tibuok nasud aron lang makit-an pagbalik iyang anak.
Tuod man, nakit-an niya iyang anak human sa 24 ka tuig.
Ang iyang kasinatian maoy inspirasyon ug gihimuan pa og pelikula niadtong 2015.
Ning bag-o lang, gibutyag ni Guo Gangtang kinsa gikan sa Henan Province nga human sa duha ka dekada, nakit-an na gyud niya iyang anak kinsa nabiktima sa human traffickers sa dihang nag-edad pa kini og dos anyos.
Nailhan niya iyang anak pinaagi sa DNA test sa Ministry ug Public Security samtang duha ka mga suspek, sigun sa Global Times, ang kasamtangang gitanggong.
“My baby, you came back!” tiyabaw sa inahan human kini mahiusa pagbalik sa iyang anak.
Sumala sa South China Morning Post nga usa ka babaye ang nikidnap sa anak ni Guo gawas sa ilang balay didto sa Liaocheng niadtong Septiyembre 21, 1997. Kapin sa dos anyos pa ang edad niini.
Matod sa taho gikan sa BBC nga duha ka suspek nga kanhi manag-uyab niadto nakakita sa anak ni Guo nga inusarang nagduwa sa balay.
Ang babayeng suspek nga si Tang maoy nilabnot sa bata ug gidala kini sa bus station diin iyang partner nga si Hu naghuwat. Nisakay paingon sa Henan ang duha ug didto nila gibaligya ang bata.
Maayong amahan
Human sa hitabo, nius-os ang timbang ni Guo og 20 kilos ug namuti dayon iyang buhok nunot sa stress.
Bisan pa man niini wa siya nitahan sa pagpangita sa iyang anak maong iyang gisugdan ang pagmotor sa tibuok nasud bitbit ang flag nga may hulagway niini ug mga flyers, saysay sa Reuters.
“Many people say I am a great father. But I am not great at all. I am helpless. I just lack the courage to restart life after experiencing tremendous hardship. Therefore, I kept on searching.”
Sa iyang pagpangita, nakasinati sab siya og mga aksidente ug mga kawatan sa karsada.
Iyang tinigum maoy iyang gigamit sa iyang tahas, nakatug na sab siya ilawom sa taytayan ug nakapanglimos human mahutdan og kwarta.
Ang iyang istorya sa kinabuhi nahimong pelikula nga may titulo nga “Lost and Love” ug ang sikat nga artista nga si Andy Lau maoy nidala sa papel ni Guo.
Human mabalitai ni Lau ang panagkita og balik, dali kini nipadayag sa iyang kalipay.
“I’d like to say to Brother Guo that I admire your persistence. I also want to salute the police authority for their years of efforts,” ni Lau.
Daghan nalipay sa Chinese social media sa balita ug nanghinaot siya nga adunay sequel ang maong pelikula.