200 metros palibot sa sibyaanan gisusi sa kapulisan

Hulagway kuha ni Amper Campana
Hulagway kuha ni Amper Campana

DUHA ka mga bala niigo kang Reynante “Rey” Cortes gamit ang wa pa matino nga kalibre sa armas base sa inisyal nga resulta sa autopsy sa Philippine National Police (PNP) Crime laboratory.

Gisusi usab sa kapulisan ang 200 metros libot sa sibyaanan aron pagsusi kon diin posible nanukad ang gunman nga gituohang usa ka sniper.

Ang close-in body guard ni Cortes nga si Felix Booc nisulti sa mga imbestigador sa Mambaling Police Station nga usa lang ka buto sa armas ang iyang nadunggan dihang gipusil ang blocktimer gawas sa sibyaanan diin siya nagprograma.

Apan sa inisyal nga resulta sa autopsy, napalgan nga duha ang mga samad sa lawas ni Cortes, nagpasabot nga makaduha siya gipusil.

Matod ni Police Lieutenant Colonel Wilbert Parilla, deputy city director for operations sa Cebu City Police Office, nga wa pa nila madawat ang official report sa PNP Crime Lab diin mahibaw-an kon unsa nga matang sa armas ang gigamit sa pagpatay.

“We don’t have yet the official report from the Soco as to the firearm used. But we have an initial... duha ka samad nga pinusilan, but we don’t have yet the exact kind of firearms used sa pagpusil kang Rey Cortes,” matod ni Parilla.

Tungod kay way nakabantay nga adunay nipusil sa magsisibya, gipasusi sa mga imbestigador sa Mambaling Police Station ang dapit ug ang 200-meter radius kon aduna bay building sa duol nga mahimong didto nanukad ang gunman.

Nigawas ang pagduda nga sniper ang nipusil kang Cortes kay buto lang sa armas ang nadungog sa mga tawo nga naa sa lugar atol sa hitabo.

Wa silay nakitang tawo nga matumbok nga maoy nihimo sa krimen.

CCTV

Samtang nagsugod na usab ang Criminal Investigation and Detection Group (CIDG-7) sa pagsubay sa mga kuha sa CCTV camera footage sa dapit diin gipusil patay si Cortes nunot sa mando sa ilang labaw nga si Police Major General Albert Ignatius Ferro.

Matod ni Police Colonel Ireneo Dalogdog, regional chief sa CIDG 7, nga ang ilang gihimo mao ang pagkolekta sa mga CCTV footage.

Ilang gikuha ang usa ka semana hangtod usa ka oras sa pagsaka ni Cortes sa sibyaanan nga footage.

Dinhi masayran kon aduna bay kadudahan nga sakyanan nga kanunay mag-estambay sa dapit.

Dinhi sila magsugod sa ilang imbestigasyon.

“Nag umpisa na kami kasi mismo si director ng CIDG, Police Major General Albert Ignatius Ferro, ay nagbibigay ng instruction mag conduct tayo ng parallel investigation about doon sa nangyari,” matod ni Dalogdog.

Blangko pa ang kapulisan kon kinsa ang naghimo sa krimen, apan matod ni Parilla nga ilang ipaubos sa interview ang duha ka body guard sa iyang bana kay maoy sugyot sa asawa.

Dili pa matawag nga persons of interest ang iyang duha ka bodyguards sanglit standard operating procedure ang pagkuha sa tanang kasayuran lakip na sa iyang escort.

Kon adunay mamatikdan nga kadudahan ang mga mogawas nga pamahayag sa iyang bodyguard, mahimong ipaubos kini sa lie detector test.

Lisud na usab nga ipa paraffin test ang mga kamot ni Booc tungod kay milapas na sa 24 oras ang insidente. (AYB, Sunstar Philippines)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph