DUL-AN sa 15,000 ka curfew ug health protocol violators nadakpan sa hiniusang operasyon sa Cebu City Government ug Cebu City Police Office (CCPO) sa unang pito ka buwan sa 2021.
Si Raquel Bohol-Arce, pangulo sa Prevention Restoration Order Beautification Enhancement (Probe) kinsa maoy gitahasan ni Mayor Edgardo Labella sa pagdisiplina ug pagpasabot sa katawhan labot sa curfew, niingon nga 14,884 ka violators ang ilang nadakpan sa Hulyo 22, 2021.
Base sa record sa Probe, sa Enero 2021 adunay 1,737 ka tawo ang nadakpan samtang 732 sa Pebrero.
Nisugod pagdagsa ang curfew violators sa Marso nga niabot na og 2,271; 2,816 sa Mayo; 2,623 sa Hunyo; ug 1,915 sa unang 22 ka adlaw sa Hulyo.
Inom lagi
Ilang naobserbahan nga nisugod og saka ang curfew violators dihang niabli na ang mga imnanan ug restaurant bars niadtong unang semana sa Mayo human gilibkas ni Labella ang liquor ban.
Si Arce nagkanayon nga base sa Executive Order sa Cebu City, ang makalapas sa curfew nga magsugod alas 11 sa gabii hangtod alas 5 sa kadlawon makabayad og P500 nga multa o community service.
Sa maong gidaghanon, gitug-an ni Arce nga 60 porsiyento sa mga nakalapas sa curfew gipailawom sa community service.
Si Police Lt. Col. Wilbert Parilla, deputy chief for operations sa Cebu City Police Office (CCPO), nagkanayon nga matag karon ug unya, molusad sila og Oplan Bulabog aron mabadlong o masikop ang mga tawo nga anaa pa sa gawas lapas sa alas 11 sa kagabhion.
Apan sukad niadtong Hulyo 19, 2021, kada adlaw na ang Oplan Bulabog sa CCPO.
Ila kining gibuhat tungod sa paspas nga pagsaka sa mga kaso sa coronavirus disease 2019 (Covid-19) sa nakalabay nga mga adlaw.
Sa kasamtangan, base sa records sa Emergency Operations Center (EOC) nga maoy adunay lista sa mga ngalan sa nagpositibo nga naka-quarantine, niabot na sa 1,480 active cases sa Siyudad human nakatala og 216 ka aktibong kaso niadtong Hulyo 22.