MAAYONG adlaw kanimo, Noy Kulas. Tawga lang ko sa ngalan nga Bregoy, taga northern Cebu.
Dili kaayo ni dakong problema ang akong patambagan. Duha ka tuig na ang nakalabay, nigasto ko og pa renovate sa balay sa akong ginikanan aron moarang-arang ang kahimtang ug pagpuyo nila nga dili na matuloan sa ulan. Medyo dako-dako kog nagasto niadto. Ang panday nga nitrabaho akoa ra sad nga mga silingan. Akong nakita nga daghan og backjob ug nagsubli-subli ang labor plus nangausik ang uban nga materyales.
Karon naka-decide mi sa akong wife nga magtukod og balay nga amoa. Pero dihay usa sa mga panday nga nihangyo nga sila kunoy motrabaho. Pero nangita nami sa akong wife og laing grupo sa mga panday nga mas makabalo ug maoy among patrabahuon. Karon, mangutana ko nga dili ba lain nga paminawon nga lain na akong patrabahuon? Angay ba kong maikog nila? Pero kami man sa akong wife ang mogasto. Aduna man sad siguro mi katungod sa pagpili sa mas makamao?
Bregoy
***
Bregoy,
Ayaw kaikog kay imoha man nang kwarta ang gastuhon. Wa diay sila maikog nga nausik ang imong kwarta tungod sa ilang gihimo nga mga sayop? Mao ni ang nakaapan natong mga Pinoy, maikog ta sa uban bisan ang ubang tawo way kaikog. Basta ilang makita nga maayo kang tawo, ila kang pahimudsan. Pangita mo og laing grupo sa mga panday, kanang specialized ang skills. Ayaw paggamit sa imong mga silingan kay namatud-an na man nga sila palpak. Lisod kaayo nang trial and error ang pagtrabaho unya kwarta baya nang involved. Ayaw na sila panumbalinga ug kaikog kay wa gani sila ana.
Noy Kulas
(rojval69@yahoo.com)