KAGAW sa pulitika daw anay nga hinayhinayng mikukot. Ang Bando Osmeña Pundok Kauswagan (BOPK) mitandog sa pamunoan ni Mayor Edgar Labella sa dakbayan sa Sugbo. Gisakyan kadtong haguka nga pagdumala sa pandemiya.
Apan naluwas sa nasudnong task force nila Chief Implementer Sec. Carlito Galvez, DENR Sec. Roy Cimatu, DILG Sec. Eduardo Año, Shield Commander Guillermo Eleazar, Visayas Deputy Implementer Melquiades Feliciano ug Baguio Mayor Benjamin Magalong.
Gimud-an sa kamahal sa bugas, sardinas, test kits, face mask, gahin sa isolation ug quarantine centers. Nangita sa donasyon nga liboan ka manok nga gibaligya. Dunay gibitay nga tarpaulin,’Tuman aron ang tanan OK.’
Si Barangay Kapitan Kirk Repollo sa Inayawan mipasakag kaso batok kang Labella kalapasan sa Solid Waste Management.
Kanhi Mayor Tomas Osmeña mihulagway sa administrasyon ni Labella nga gisanapan sa kahakog ug kasilag. Walay kaluoy sa vendors sa pagmoderno sa Carbon Market. Nakamansa sa pangalagad ni Labella ang desisyon sa mga tawo sa iyang palibot, kadtong tukorong sementeryo ug isyu sa tuob.
Dihay nagkasumpaki nga executive order kabahin sa pagtimon sa pandemiya. Nakalawgaw sa hinabang ang gitukod nga Mayor’s Information Liason Office. Pakyas ang saad nga hingpiton ang Cebu City Medical Center sa unang 100 ka adlaw. Si Cimatu mao nay nagpahinomdom paglimpyo sa kasapaan. Saad nga mananom og 3M ka mga kahoy apan namutol og 389 ka mahogany.
Gumikan sa hulga sa pandemya naapektohan ang gilaraw nga mga proyekto. Unod sa state of the city address (Soca) ang PCR machines, personal protective equipments, test kits, negative pressure ambulance isolation centers, quarantine centers, cluster clinics, tracing teams ug dialysis machines.
Gasto sa miaging tuig mokabat og P2.5B. Ang Commission on Audit mihatag og star rating nga limpyo ang paggasto sa salapi. (csa_1156@yahoo.com / 09064648954)