NAGBAHA ang mga positibong komento labot sa labing uwahi nako nga gi-upload sa akong Youtube channel. Kini mao ang makadaghan na nako dinhi hisguti nga tukar bisan asa, iyawat na lang may maluoy pagtunol sa ilang sensiyo. Gitawag ni og busking o street perfomamce nga uso kaayo sa mga nasod sa Uropa ug Ameika. Dinhi sa ato wala kaayo ni mauso.
Kasagaran sa mga tukar tua sa mga imnanan, concert ug ubang espisyal nga okasyon. Mao nga sa dihang may nagpahibalo nako nga may usa ka grupo nga nagplano niini, nangita dayon ko og paagi unsaon nga maka-connect sa mga hingtungdan.
Taudtaod sab nakong hapahapa kong asa sila mag-busking hangtod nga naporma ang usa ka espisyal nga presentasyon sa akong Youtube channel.
Gusto nakong pasalamatan ang amahan ug anak nga sila si Marvin ug Kevin Mark Dullo. Sila maoy utok ning maong busking nga gisalmotan sab ni Herbert Anga usa ka gitarista.
Sa akong presentasyon gipailaila si Pat Vosotros nga taastaas na sab og kaagi kung musika ang hisgutan.
Si Pat nakaila ni Marvin samtang siya nanuroy og isda. Biko, puto ug isda mao ni pulipulihon ni Marvin og suroy kong walay busking.
Human magsayranay sa ilang tagsa tagsa ka abilidad sa pag-awit, way duha duha nga gitanyag ni Pat ang iyang sound system nga magamit sa grupo sa ilang busking. Ninindot og kalit ang audio sa ilang tukar itandi niadtong baratuhon nga sound system nga una nilang gigamit pagsugod sa busking.
Karong bag-o napuno si Sophia Plaza, ang 21 anyos nga violinist. Si Sophia 8 anyos pa lang nga nagkat-on sa music, magtukuran sa Cebu Metropolitan Cathedral isip sakop sa choir.
Ning panahon sa pandemiya, nakadungog nako og mga musikero nga naningkamot nga may masapian sila bisan sa ginagmay nga paagi. May nanawat na og booking alang sa nagkadaiyang okasyon.
Apan lahi ang grupo ni Marvin nga nag-busking.