Duha ka balay ang natumbahan sa 100 anyos kapin na nga punoan sa mangga human sa kusog nga hangin nga dala sa habagat sa Gothong Road, Barangay Subangdaku, dakbayan sa Mandaue, alas 6:00 sa gabii niadtong Huwebes, Hulyo 22.
Matod ni Ernie Manatad, ang kapitan sa Barangay Subangdaku, nga tungod sa kakusog sa hangin niadtong Huwebes ang hinungdan sa pagkatumba sa maong punoan sa mangga.
Sigon sab niya nga niadtong orasa aduna sab silay giputol nga sanga sa kahoy kuyog ang mga kawani sa Mandaue City Disaster Risk Reduction Management Office (CDRRMO).
Nakadawat sila og tawag gikan sa mga residente nga adunay natumba nga kahoy diin adunay mga balay nga natumbahan.
Daling miresponde ang DRRMO ug ang rescue team sa Barangay Subangdaku ug gipadad-an kini og chainsaw tungod lisod maputol ang kahoy tungod sa kadako niini, sigon ni Manatad.
Nakahinabi sab sa Superbalita Cebu si Janneth Velasquez Bacalso, residente sa lugar diin ang kahoy anaa sa ilang luna.
Sigon niya nga sa wala pa natumba ang kahoy, nikatkat ang ilang silingan nga si 'Toto' aron magkuha og bunga sa mangga.
Nag-atang si Bacalso ni Toto kay mangayo sab siya og mangga ug sa dihang pagnaog ni Toto sa atop niinanay og katumba ang punoan sa mangga diin ang atop sa agianan nilang Bacalso ug garahian ug parte sa balay sa ilang silingan natumbahan sa dkong punoan niini.
Matod ni Bacalso nga bata pa siya anaa na ang maong punoan, gani sigon sa mga silingan, nga mas tigulang pa ang maong punuan kaysa sa iyang apohan nga 90 anyos mitaliwan na.
Udto niadtong Biyernes Hulyo 23, matod ni Bacalso nga wala pa nakuha ang punoan tungod sa kadako niini, kinahanglan kini anam-anamon og kuha ang sanga o pul-ongan.
Sa maong insidente, matod ni Manatad nga wala ray nakaangkon og kadaut sa mga residente.
Matod ni Manatad, gi-require ang kada barangay sa Mandaue nga maghimo og reporting sa mga peligrosong mga kahoy o punoan sa ilang lugar aron maputlan dayon ang mga sanga niini aron malikayan ang disgrasya.
Dugang niya nga labi na karong kusg kanunag ang hangin nga habagat. (KFD)