Unom ka tindahan sa Metro Cebu nga dili awtorisado nga mamaligya sa pipila ka brands sa motorcycle parts ug helmets ang gironda sa mga sakop sa Criminal Investigation and Detection Group (CIDG) 7.
Dul-an sa tunga sa milyon ka pesos nga balor sa helmets ug motor parts ang nasakmit sa CIDG 7.
Unom ka mga tawo ang nasikop sa mga sakop sa mga ahente sa CIDG human naatlan sa gilusad nga entrapment operation nga namaligya og mga kagamitan sa motorsiklo nga dili awtorisado sa distributor niini sa nasod.
Ang mga nadakpan giila nga silang Rogelio de Luna, Jho-an Villanueva, Harry Formentera Adasa, Orlando Capisnon Asolon, Noel Tamang ug Pete Nino Codilla.
Nakuha gikan kanila ang mga double ug single suspension shocks sa motorsiklo nga adunay nakatatak nga YSS ug mga KYT nga helmets nga mobalor ang tanan og P463,200.00.
Matod ni Police Colonel Ireneo Dalogdog, hepe sa CIDG-7, sa miaging semana, usa ka Eduardo Macam Chua, tag-iya sa Moto Industriya nga nagbase sa Manila nga exclusive distributor sa maong matang sa brands sa motorcycle parts, nidangop sa ilang buhatan labot sa paghitak sa pagpamaligya niini sa Metro Cebu.
Gilusad dayon nila ang entrapment operation sa LLB Motorcycle Parts and Trading, OMG Motor Parts, Heng Thai Motor Parts, Hard Stuff Helmet Trading, Heng Motor Parts ug Skut Garage sa nagkalainlaign dapit sa Meto Cebu.
Dugang ni Dalogdog nga tungod kay counterfeit ang mga helmet ug peligro usab kini sa mga motorista nga mogamit niini.
Ang mga nasakmit nga helmets wala kini moagi sa pagsusi sa Department of Trade and Industry (DTI) sa pagsusi niini alang sa kaluwasan sa motorista
Awhag sa CIDG 7 sa publiko nga kung adunay mamaligya niininng maong matang sa brands nga wala moagi sa exclusive distributor, mahimong i-report kini sa kapulisan aron madakpan ang mga tawo nga nag negosyo niini. (AYB)