Rama: isulti unsay kahimtang sa mayor

Cebu City Acting Mayor Michael Rama. (File photo)
Cebu City Acting Mayor Michael Rama. (File photo)

Si Cebu City Acting Mayor Michael Rama miawhag sa pamilya ni Mayor Edgardo Labella sa pagsulti unsay kahimtang sa mayor.

Kini human nikatap ang mga balita nga namatay si Labella sa Huwebes sa gabii, Hulyo 22, 2021.

Si Rama niingon nga usa ka pamahayag o pagklaro sa pamilya dako og ikatabang “so everybody will not hide any innuendos, any assumptions.”

“We know pretty well that the mayor is in the hospital. We know pretty well that the mayor is trying to get back in shape. We know pretty well that there is something more to that and I wish the family should speak out,” nagkanayon si Rama.

“I think it’s about time that the family should be coming out,” matod ni Rama.

Si Jaypee Labella, sa usa ka mensahe nga gipadala sa media, niingon nga ang iyang amahan nag-recover pa sa pneumonia ug “is actually doing better.”

Matod ni Jaypee nga ang pamilya mogawas og pamahayag “when the time is right.”

Si Rama gusto usab nga makigsulti kang Labella, apan siya gisultihan nga ang mayor di manawat og bisita.

“I want to see my mayor.”

Si Rama makigsulti unta kang Labella sa Huwebes, Hulyo 22, 2021, apan wa kini mahitabo.

Ang katapusang higayon nga dunay interaction sila ni Labella niadto pang Hunyo 2021 pinaagi sa pagtubag sa iyang text message dihang ang mayor nipailawom sa tulo ka semana nga medical leave.

Si Cebu City Administrator Floro Casas Jr. nanghimakak usab sa nikatap nga taho nga namatay ang mayor.

“In fact last night, around 9-10 o’clock, I was in the hospital and mayor is okay. I was even surprised where did that rumor came from,” matod ni Casas.

Matod ni Casas nga ang mayor nagpadayon sa iyang pagpatambal sa pneumonia.

Si Casas niawhag sa nagpakatap ning hungihong sa paghunong niini kay ang mayor angay nga tahuron.

Matod ni Casas nga si Rama magpadayon sa pagdumala sa City Hall samtang si Labella naa pa sa ospital.

Si Casas niingon nga makigsulti pa siya sa doktor sa mayor kon si Labella nagkinahanglan pa bang mopahuway kon i-discharge o mabalik na ba sa iyang trabaho.

Siya niingon nga wa pay balita kon kanus-a ma-discharge ang mayor.

Usa ka kasaligang tinubdan niingon nga mataudtauran pa nga makagawas si Labella sa ospital.

Si Labella nag-medical leave niadtong Hulyo 14-16. Apan iya kining gilugwayan gikan sa Hulyo 19-25 aron siya maatiman pa og maayo sa mga doktor.

Hulyo 19, iyang gitudlo si Rama isip acting mayor hangtod sa iyang pagbalik.

Si Labella nabalaka nga naigo siya sa pneumonia tungod sa iyang way undang nga ubo.

Unang nalandig si Labella sa tambalanan niadtong sa Enero niining tuiga gumikan sa ear infection.

Sa Hunyo, ni file usab siya og medical leave sulod sa tulo ka mga semana aron maulian gikan sa sepsis.

Sa gihimo nga check-up sa mayor, nasuta nga adunay sepsis si Labella hinungdan pagkaluya sa iyang kalawasan. (JJL, dugang taho ni REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph