SUPERBALITA CEBU

Wa mobayad sa P300, gipatay

Water attendant gipusil patay kay giingong wala mobayad sa P300 nga utang niadtong Huwebes sa alas 10:30 sa buntag, Hulyo 22, 2021 sa Brgy. Nangka, Lungsod sa Consolacion.

Ang biktima giila nga si Ramil Bruno Bantolio, 36, ulitawo, taga Brgy. San Vicente, Lungsod sa Liloan.

Ang suspek nga si Danilo Agusto Alburan, 42, minyo, taga Brgy. Looc, Dakbayan sa Mandaue, nadakpan sa follow-up operation sa kapulisan alas 8:50 sa gabii sa Huwebes sa Brgy. San Vicente.

Si Police Staff Sgt. Arnold Rosiana sa Consolacion Police Station nga nahinabi sa Superbalita Cebu nagkanayon nga sila si Bantolio ug Alburan managkaila.

Si Bantolio na-busy sa trabaho sa refilling station sa tubig.

Kalit nga niabot si Alburan nga naglakaw lang ug wa makabantay si Bantolio kay nagtalikod dihang gipusil siya sa buko-buko. Patay nang niabot si Bantolio sa ospital tungod sa usa ka samad sa buko-buko.

Matod pa ni Rosiana nga ilang nasubay nga si Alburan nga mag-adtoan sa balay sa iyang iyaan sa Brgy. San Vicente busa ilang giadto ug gidakop.

Wa mosukol si Alburan sa kapulisan. Wa silay nakuhang pusil kang Alburan, apan siya ang gitumbok sa mga saksi nga maoy namusil.

Niadtong Martes, sila si Bantolio ug iyaan ni Alburan nagkalalis kalabot sa utang nga P300.

Giingong niagi si Bantolio sa tindahan sa iyaan ni Alburan.

Gipaningil si Bantolio sa iyang utang nga P300, apan wala mobayad, hinuon gitulisok niya ang iyaan.

Akto sab nga naglingkod si Alburan sa gawas sa tindahan sa iyang iyaan ug naapil sa lalis.

“Wa daw mobayad ning biktima. P300 ra man iyang utang unya gitulisok man niyag apil ang suspek kay milaban sa iyaan. Nasuko maoy nipalit sa away,” dugang ni Rosiana.

Mao kini ang motibo ni Alburan sa pagpatay kang Bantolio, dugang ni Rosiana.

Si Alburan naa gitanggong sa Consolacion Police Station ug pasakaan og kasong murder.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!