Trese ka mga police personnel sa Samboan Police Station ang natakbuyan sa coronavirus disease 2019 (Covid-19) lakip na ang 14 ka mga piniriso niini.
Matod ni Police Colonel Engelbert Soriano, hepe sa Cebu Provincial Police Office (CCPO) nga sa 14 ka piniriso nga na Covid, usa kanila nadala sa tambalanan. Ang iyang kahimtang gi-monitor na sa mga pulis.
Tungod niini, nagpadala og walo ka mga personnel gikan sa Provincial Mobile Force Company ang CPPO aron modugang sa kakuwangon sa mga pulis sa lungsod human gipatuman sa local nga kagamhanan ang hard lockdown sa mga barangay nga taas og mga kaso sa Covid-19.
Gisaad ni Soriano nga di maapektuhan ang batakang serbisyo sa police station ngadto sa mga lumolupyo sa lungsod sa Samboan tungod kay aduna pay mga personnel nga wa maigo sa Sars-CoV-2, kagaw sa Covid-19, lakip na ang ilang hepe.
Gimando ni Mayor Emerito Calderon ang ‘hard lockdown’ sa pito ka mga barangay sa lungsod sugod sa Hulyo 23 hangtod sa Hulyo 28.
Ang mga barangay nga gipaubos sa lockdown mao ang Bato, Bonbon, Colase, Suba, Dalahikan, Poblacion ug Tangbo. Kini tungod sa pagsaka sa mga kaso sa Covid-19 sa lungsod.
Sa pagluwat ni Calderon sa mando, niabot og 24 ang aktibong mga kaso. (AYB)