Sagol kalipay, hilak ug pagpangurog sa mga tuhod ang gibati ni Melchor “Mhel” Buenaflor dihang nipaso sa stage atol sa ilang graduation sa kolehiyo.
Dili makalimtan ni Mhel ang Hunyo 1, 2021, ang usa sa mga labing malipayong adlaw sa iyang kinabuhi, kay sa maong adlaw nakab-ot niya ang kalamposan nga gipangandoy.
Sa maong adlaw, nahitabo ang ilang virtual graduation sa Cebu Eastern College (CEC). Siya nitapos sa kursong Bachelor of Science in Development Communication sa edad nga 30.
Atol sa ilang graduation, nakadawat og mga pasidungog si Mhel sama sa Academic Excellence Awardee-3rd honor, Development Communication Scientist of the Year, Supreme Student Government President Awardee ug Cebu City Scholar-Cebu Eastern College President Awardee.
Giangkon ni Mhel nga nakasuway siya nga gi-bully sa iyang kanhi classmates gumikan sa iyang pangidaron. Apan wa kini makapugong sa iyang pangandoy.
Niadtong 2012, ni-graduate sa sekondarya si Mhel sa night department sa Don Vicente Rama Memorial National High School ug nakapadayon og eskwela sa 1st semester sa Hunyo sa samang tuig sa CEC. Apan naundang sa pagtungha sa second semester sa 2013 gumikan sa kawad-on.
Niadtong 2015, nabalik siya og eskwela. Sa samang panahon, gidungan niya ang pagtrabaho ug pag-eskwela.
Nagtrabaho siya og dul-an tulo ka tuig isip assistant secretary ug gender and development focal person sa barangay hall sa Barangay Basak Pardo, siyudad sa Sugbo.
Ang iyang honorarium maoy gibayad niya sa ilang tuition.
Aron makadugang sa iyang kita, nang-raket usab si Mhel isip events host diin naila siya isip “buak nga host sa Cebu.”
Nagsunod-sunod ang mga grasya nga nadawat ni Mhel kay nahimo siya nga eskolar sa Kagamhanan sa Siyudad sa Sugbo hangtod na sa iyang pag-graduate sa kolehiyo.
Nakadawat usab siya og P6,000 nga subsidy matag semester gikan sa Kalinga partylist nga nakatabang og dako sa iyang pagtungha.
Matod ni Mhel, kon wala siya maningkamot ug midiskarte sa kinabuhi, hayan kutob lang sa pangandoy ang tanan alang kaniya.
“(I) continue to be brave all the time. Because walay mobarog sa akoa if dili ko. Dapat mobarog ko for myself. I need to stand with the Lord. I need to face everything,” paambit ni Mhel.
Siya lang ang bugtong nakatapos sa pag-eskwela sa kolehiyo sa pito ka managsuon. Ang iyang inahan ug amahan wa usab makahuman sa pagtungha.
Ang kalisod sa kinabuhi ug ang pangandoy nga mapaarang-arang ang kahimtang sa pamilya, maoy nagdasig ni Mhel nga kab-uton ang kalamposan sa pag-eskwela.
Karon, anam-anam nga natuman ang kanhi gipangandoy lang ni Mhel.
Sa Agusto karong tuiga, magsugod na siya og tudlo sa CEC dungan sa iyang pag-eskwela og masters sa public administration.
Aduna na usab negosyo nga food cart si Mhel kauban sa iyang mga higala ug networking. (SCG)