Matod pa sa inila ug bantugan nga Indian writer, poet ug philosopher, Rabindranath Tagore (1861-1941) nga: ‘Ang kamatayon dili mao ang pagpakgang og pagsanta sa kahayag; kon dili mao ang pagpawong sa lampara gumikan kay mi-abot na ang kabuntagon.’
Si Komentarista Reynante ‘Rey’ Cortes, 47, nagsugod sa pagpanibya sa DYMF Bombo Radyo Cebu niadtong mga dekada 90. Usa siya sa mga staff reporter. Ako ang production manager sa dihang mi-apply siya. Si karon Tudela, Camotes Mayor Greman ‘Jojo’ Solante ang among station manager. Ako ang mi-interview ni Rey ug bisan way igong kasinatian apan aduna may determinasyon ug abilidad nga mahimong magsisibya, amo siyang gi-hire.
Sa dihang mibalhin ako sa DYSS (RGMA) Cebu niadtong 1997, si Kit Matus, assistant researcher sa Bombo Radyo nga hinigugma ni Rey ug nahimong asawa, niuban kanako sa pagbalhin sa DYSS. Si Kit maoy among news director sukad sa pagsugod namo sa DYSS sulod na sa 26 ka tuig. Sukad niadto, wala na kaayo kami magkita ni Rey. Ako na lang nahibaw-an nga ni-resigned siya sa Bombo Radyo ug nag-blocktime.
Bisan tuod og blocktimer siya, apan susama ang among propisyon nga anaa sa broadcast media. Mohatod sa mga balita ug mokomentaryo sa mga hiwing binuhatan labi pa sa anaa sa posisyon sa kagamhanan. Ang media dako og papel ning atong katilingban kay dangpanan sa mga dinaug-daug ug nilupigan.
Tinuod, sakit usahay mosulti ang media labi pa kon ang gisulti maoy kamatuoran. Kay matod pa bitaw ‘sakit man ang kamatuoran.’ Apan sa mga tawo nga naigo sa komentaryo, igo bang rason nga mogamit ug mosagop sa bayolente nga paagi aron makabalos sa mediaman? Aduna pa man kitay hukmanan ug anaa ang libel law sa atong Codigo Penal nga puwedeng makapasaka og kaso ang argabyado nga tawo batok sa ‘abusado nga mediaman’ kon abusado man gani para sa argabyado nga partido.
Isip kauban sa buhat ni Rey Cortes ug isip higala, apil ako sa manawagan ngadto sa atong mga awtoridad nga unta mahatagan og hustisya ang iyang brutal nga kamatayon pinaagi sa pagpusil. Requiescat in pace (rest in peace), Kumentarista Rey Cortes. (bobbygnalzaro@gmail.com)