LALAKE nga padulong unta mag hatod sa mga order nga karneng baboy nadakpan sa kapulisan didto sa Barangay San Pablo, Ormoc City alas 7 sa buntag, Martes, Hulyo 20, 2021.
Giila sa kapulisan ang dinakpan nga si Rodrigo Francisco, 47, taga Purok 2, San Pablo, Ormoc City.
Base sa report sa kapulisan, ang suspek sakay sa iyang multicab ang padulong unta maghatud sa mga order nga karneng baboy gikan sa Purok 2 paingon sa Simangan.
Dugang pa sa report, walay napakita nga meat inspection certificate ang dinakpan.
I-agi sa slaughterhouse
Si Dr. Joseph Cortes sa City Veterinary Office nipasabot sa publiko nga tanan nga baboy nga ihawon dapat i-agi gyod sa slaughterhouse aron masusi sa mga meat inspectors ug ma isyuhan og ante-mortem certificate.
Sa una pa dad-on sa slaughterhouse ang baboy, dapat mo kuha una og certificate to transport gikan sa Barangay kapitan.
Dili itabok sa laing barangay
Giklaro usab ni Cortes nga bawal pa sa pagkakaron nga itabok sa laing barangay ang mga buhing baboy, dapat ilahos na kini sa slaughterhouse.
"Pero kung karne na or pork products, pwede ra siya itabok pero kung buhi, dili gyod pwede," pasabot ni Cortes.
Dugang ni Cortes, ang slaughterhouse mo dawat og baboy gikan alas 8 sa buntag hantud alas 5 sa hapon.
Ang inihaway ipahigayon sa kadlawon ug tanan nga baboy hutdon gyod pag ihaw o “All-in” ug “All-out.”
Lakang batok ASF
Gisugilon ni Cortes nga kining tanan ilang gibuhat aron mapugngan ang pagkatap sa African Swine Fever (ASF) kahuman naigo ang dakbayan niadtong Hunyo.
Gatusan ka mga buhing baboy ang gipamatay hilabi na kadtong nasakop sa 500-meter radius gikan sa index case sa Salvacion.
Si Mayor Richard Gomez niisyu og executive order pagpatuman og “pork holiday” sa dakbayan sugod Hulyo 3 hantud Hulyo 17.
Bisan sa paglibkad sa kamanduan, duna gihapon pipila ka kondisyon.
Ang dakbayan sa Ormoc modawat lang og buhing baboy basta gikan lang sa lugar nga walay ASF sama sa Cebu ug Bohol ug dapat i-agi kini sa pantalan ug dunay saktong papeles.
Naa na sa kustodiya ang dinakpan ug gipasakaan og kasong kalapasan sa section 51 sa Republic Act 9296 samtang na-impoung ang iyang multicab sa Police Station 1. (JKDP)