Ormoc City - Lalake nga padulong unta maghatod sa mga order nga karneng baboy nadakpan sa kapulisan, didto sa Barangay San Pablo, Ormoc City, alas 7 sa buntag, Martes, Hulyo 20, 2021.
Giila sa kapulisan ang dinakpan nga si Rodrigo Francisco, 47, taga Purok 2, San Pablo, Ormoc City.
Base sa report sa kapulisan, ang suspek sakay sa iyang multicab ug padulong unta maghatud sa mga order nga karneng baboy gikan sa Purok 2 paingon sa Simangan.
Dugang pa sa report, walay napakita nga meat inspection certificate ang dinakpan.
SLAUGHTERHOUSE
Si Dr. Joseph Cortes sa City Veterinary Office nipasabot sa publiko nga tanan nga baboy nga ihawon dapat iagi gyud sa slaughterhouse aron masusi sa meat inspectors ug maisyuhan og ante-mortem certificate.
Sa dili pa dad-on sa slaughterhouse ang baboy, dapat mokuha una og certificate to transport gikan sa barangay kapitan.
DILI ITABOK
Giklaro usab ni Cortes nga bawal pa sa pagkakaron nga itabok sa laing barangay ang mga buhing baboy, dapat ilahos na kini sa slaughterhouse.
“Pero kon karne na or pork products pwede ra siya itabok pero kung buhi, dili gyod pwede,” pasabot ni Cortes.
Dugang niya ang slaughterhouse modawat og baboy gikan alas 8 sa buntag hangtud alas 5 sa hapon.
Ang inihaway ipahigayon sa kaadlawon ug tanan nga baboy hutdon gyod pag-ihaw o 'all-in' ug 'all-out.'
LAKANG BATOK ASF
Gisugilon ni Cortes nga kini ilang gibuhat aron mapugngan ang pagkatap sa African Swine Fever (ASF) nga niigo sa dakbayan niadtong Hunyo.
Gatusan ka mga buhing baboy ang gipamatay hilabi na kadtong nasulod sa 500-meter radius gikan sa index case sa Salvacion.
Si Mayor Richard Gomez niisyu og executive order pagpatuman og ‘pork holiday’ sa dakbayan sugod Hulyo 3 hantud Hulyo 17.
Bisan sa paglibkas sa kamanduan, duna gihapon pipila ka kondisyon.
Ang dakbayan sa Ormoc modawat og buhing baboy basta gikan lang sa lugar nga walay ASF sama sa Cebu ug Bohol ug dapat iagi kini sa pantalan ug dunay saktong papeles.
Naa na sa kustodiya ang dinakpan ug gipasakaan og kasong kalapasan sa Section 51 sa Republic Act 9296, samtang na-impound ang iyang multicab sa Police Station 1. (JKDP)