Didal pakyas apan 'smile' ra gihapon

OLYMPICS: Mao kini ang usa sa gipakitang tricks sa Sugbuana nga si Margielyn Didal sa iyang kampanya sa women’s street skateboarding final round sa Tokyo Olympics kagahapon, Hulyo 26, 2021. / AP Photo
OLYMPICS: Mao kini ang usa sa gipakitang tricks sa Sugbuana nga si Margielyn Didal sa iyang kampanya sa women’s street skateboarding final round sa Tokyo Olympics kagahapon, Hulyo 26, 2021. / AP Photo

Napakyas ang bantugang Cebuana skateboarder nga si Margielyn Didal sa iyang tinguha nga makahatag og medalya alang sa Pilipinas sa women’s skateboarding street competition sa Tokyo Olympics kagahapon, Hulyo 26, 2021, sa Ariake Urban Sports Park sa Japan.

Sa iyang kampanya, sulod sab sa pipila ka mga higayon nga nalukapa si Didal apan sa iyang matag lukapa, nibangon siya nga naka-smile bisan tataw nga aduna na siya’y gipamati nga sakit sa iyang lawas.

Taliwala sa iyang kapakyasan, ang 22 anyos nga lumad nga taga Lahug, Cebu City nakahatag gihapon og dungog sa Pilipinas sa iyang pagsulod sa top 8 overall final round sa kompetisyon diin lakip sa iyang nalabwan mao sila si world No. 1 Pamela Rosa ug world No. 4. Leticia Bufoni, pulos Brazilians.

Sa preliminary round, nga gikombatihan og 20 ka dekalidad nga skateboarders sa tibuok kalibutan nga gibahin sa upat ka Heats, si Didal nahiluna sa No.7 overall human siya nakatigom og 12.02 puntos sa Heat 2.

Igo na kini aron makakuha og puwesto ang 2018 Asian Games gold medalist sa final round diin ang top 8 overall ang makasulod.

Sa final round, nagtakiang si Didal human siya natumba sa premiro niyang pagsuway sa tricks section. Hinuon mibangon si Didal nga naka-smile.

Mibawi si Didal pinaagi sa pagrehistro og 2.97 puntos sa ikaduha niyang pagsuway sa tricks section.

Makita nga adunay senyales sa pagkaangol si Didal apan padayon siyang mikombati sa katapusang tulo ka mga pagsuway nga pulos wala niya nalampos.

Sa final round, nahimutang sa ikapitong luna si Didal dala ang kinatibuk-ang 7.52 puntos.

Ang nakaangkon sa gold, silver ug bronze medals sa kompetisyon pulos teenagers.

Nakaangkon sa gold mao si Momiji Nishiya sa Japan, 13, ang mikuha sa silver mao ang si Rayssa Leal sa Brazil, 13, samtang ang milangkat sa bronze mao ang laing Japanese nga si Funa Nakayama, 16. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph