Misaka sa quarter-final round si Filipina Nesthy Petecio human sa kulbahinam niyang kadaugan batok sa kanhi world champion nga si Lin Yu-Ting sa Chinese-Taipei, 3-2, sa women’s featherweight boxing event sa Tokyo Olympics kagahapon, Hulyo 26, 2021 sa Japan.
Si Lin, kinsa nahimong bantamweight world champion niadtong 2018, nibawi sa 2nd round human siya gilupig ni Petecio sa 1st round.
Hinuon sa nagsunod nga rounds, tataw nga nakuha ni Petecio ang pagtando sa judges aron padag-on siya sa away.
Sa premiro niyang away, gidominar ni Petecio si Marcelat Sakobi Matshu of Democratic Republic of Congo, 5-0.
Si Petecio nagkinahanglan na lang modaog sa sunod niyang tahas batok kang Yeni Marcela Arias Castaneda sa Colombia aron makaseguro siya og bronze medal sa kompetisyon.
Sa laing away kagahapon, ang Pinoy nga si Carlo Paalam nakasulod sa top 16 human sa iyang kadaugan batok kang Brendan Irvine sa Iran, 4-1, sa men’s flyweight division. (ESL)