Roldan: Delta Variant Plus?

HUMAN sa dugay nga pagbantay, gibalita nga nisulod na ang Delta variant sa Covid-19 sa Davao. Unang gibalita nga may mga tripulante sa usa ka barko nga gikan sa Indonesia nga nidunggo diri sa Butuan unya bisan wala pa miguwa ang resulta sa ilang swab test, nibiyahe na usab kini ngadto sa Luzon. Ulahi na nga nahibaloan nga pipila sa mga tripulante nagpositibo diay sa Covid.

Ang nakapait pa kay nisakay ang usa kanila og bus gikan sa Butuan ngadto sa Zamboanga City.

Gawas sa India, grabe ang pagkuyanap sa pandemiya sa Indonesia tungod kay Delta variant na diay ang niigo kanila.

Gigukod gilayon ang mga nagpositibong tripulante apil ang nag-bus padulong sa Zamboanga diin nakapanakod na kini sa uban samtang nagbiyahe. Mao nga gibalitang may Delta variant na sa Cagayan de Oro ug niadtong Sabado lang may balita nga anaa na daw kini sa Davao.

Kuyaw tuod pero unsa man diay ning Delta variant sa Sars-CoV-2 virus o Covid-19?

Unang nailhan ang Delta niadtong Disyembre 2020 didto sa India nga nagdala'g daghang kamatay. Dali kining nikuyanap sa ubang nasud sa Europe ug natala ang unang kaso sa Delta nga gitawag usab nga B.1.617.2 variant didto sa US niadtong Marso 2021.

Ingon pa sa mga eksperto sa Yale University nga tanang virus mausab o mag-"mutate" samtang motakod kini sa uban apan ang kalainan sa Delta kay ang gikusgon niini pagtakod sa uban.

Dugang pa sa WHO nga 50% nga mas kusog kini sa orihinal nga Alpha variant sa Covid-19. Motakod kini sa 2.5 ngadto sa 4 ka tawo nga iyang ikahibalag nga walay bakuna o suot nga maskara.

Ikaduhang impormasyon mao nga mas delikado ang tawo nga walay bakuna.

Sumala sa pagtuon sa United Kingdom nga ang mga bata ug tawo nga 50-anyos paubos kay posibleng mataptan 2.5 ka pilo.

Hangtud karon wa pay aprobadong bakuna para sa batang nagpanuigon og 5-12 anyos. Delikado kini sa mga bata ug batan-on.

Ang ikatulong impormasyon mao nga paspas kining motakod sa nagsikbit nga lugar nga minus ang nagpabakuna o gitawag sa eksperto nga "hyperlocal outbreaks." Mora kini og mga manok nga walay bakuna nga mangamatay kung may nagbakuna sa manok sa silingan.

Ang ikaupat nga impormasyon kabahin sa Delta mao nga wa pa kini gayud mailhi kung mas grabe ba kaysa sa orihinal nga Alpha variant. Dunay pagtuon sa Scotland nga nagpakita nga duha ka pilo kining mas grabe nga nagkinahanglan isulod sa hospital ang pasyente samtang may pagtuon sab nga wa kaayoy diperensiya ang duha.

Lahi sab ang simtomas sa Delta sama sa taas nga hilanat, sip-on ug pagaw sa tutunlan.

Ang ikalima nga impormasyon mao nga ang pagpabakuna ang tubag sa Delta.

Sa bag-ong pagtuon nakita nga mas epektibo batok sa Delta ang bakuna gikan sa Pfizer-BioNTech (88-96%) ug ang Oxford-AstraZeneca (60-93%).

Busa mas maayo ang kompletuhon ang duha ka tusok sa bakuna kay nabalaka ang mga eksperto sa bag-o na sab nga "mutation" nga Delta Plus variant o K417N nga mas grabe pa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph