GILAUMAN ang pagguot sa dagan sa trapiko human mipahibalo ang City Transport and Traffic Management Office (CTTO) sa siyudad sa Davao ngadto sa mga motorista nga mangita og laing kaagian tungod isirado ang Bolton Bridge II subay sa pagahimuong pag-repair niini.
Sa advisory sa CTTMO sa ilang Facebook page, ang pagsirado himuon karong Hulyo 31 ngadto Agosto 31, 2021.
Gipahimangnoan ang mga motorista nga mamahimong moagi sa J.P. Laurel Avenue, Quirino Avenue padulong MacArthur Highway; G. Torres St. (Sandawa), Generoso Bridge - Quirino Ave.; C.P. Garcia o sa JP Laurel, Quirino Ave. - padulong McArthur Highway; 4. CP Garcia o McArthur Highway.
Sumala sa CTTMO nga bastante ang ilang mga personahe nga ibutang sa mga dalan nga mamahimong alternative routes.
Sa maong post, di malikayan ang mga negatibong reaksiyon sa mga motorista, apan kinahanglan mosunod gumikan usa kini ka pamaagi sa pagpalambo sa mga kalsada sa siyudad.
Una niini, gibaha og reaksiyon sa mga netizens ang kadugay sa mga proyekto sa Department of Public Works and Highways (DPWH) Davao Region partikular sa pag-repair sa mga kalsada sa San Pedro Street, Davao City nga maoy nakapaguot sa dagan sa trapiko.
Nagpasabot na sab ang DPWH labot niini. (Jeepy P. Compio)