SA NGALAN sa kagawasan sa pagpadayag, malampuson ang gipahigayong rally kagahapon, Hulyo 26, diin dili lang sa kaulohang Manila ug sa mga siyudad, lakip na dinhi sa Davao City atol sa adlaw sa ulahing State of the Nation Address (Sona) ni Pangulong Rodrigo Duterte.
Buntag pa lang, mipahigayon na og anti-Sona rally ang pipila ka mga progresibong grupo sa Davao City, partikular sa Bankerohan Public Market, Agdao ug sa Roxas Avenue.
Gibatikos sa maong grupo si Duterte human giingong napakyas kini nga ibangon ang marginalized sectors sa Mindanao.
Gipatubag sab nila ang Presidente sa giingong pakyas niini nga programa sa pandemya pinaagi sa lockdown, repression, kakulang sa ayuda ug suporta sa mga health frontliners sa nasud.
Nakasuot og face mask, face shield ug mituman sa social distancing batok Covid-19 ang mga nag-rally.
Apan, nahisgutan sa Sona sa pangulo nga ulahi ang pipila ka bahin sa Mindanao labi na ang sa Davao City.
“Why is Davao last? Sinabi ko sa kanila, unahin niyo ang buong Pilipinas. During the initial years of my presidency, I told economic managers, DPWH, pati DOTr: unahin ninyo ang Luzon at ibang areas sa Mindanao. Sinadya ko talaga na ipanghuli ang Davao. Kaya for the Dabawenyos, you should understand,” tipik sa Sona sa pangulo.
Dugang sa pangulo, "To sustain our momentum in infrastructure development, I have directed DPWH, DOTr, Neda, DOF, and DBM to be on full speed to ensure that flagship projects will be completed within my term."
Sa hisgutanang giingon sa mga militante nga napakyas ang pangulo sa mga programa sa pandemya, gipasalamatan hinuon niini ang mga tawo nga nakiglambigit sa pagbugno batok Covid-19.
"Allow me this opportunity to extend my personal and the nation's gratitude to all those who selflessly give their all in the fight against Covid-19. I would like also to extend my deepest appreciation for the generosity of the private sector who came to the government's aid in fighting Covid-19," tipik sa pangulo.
Hinuon, malampusong nahuman ang Sona sa pangulo, apan di malikayan ang paghatag niini og mga "adlibs" nga maoy makapadugang diha sa pagpadasig sa mga naminaw.
Malaumon ang pangulo nga sa iyang ulahing Sona mahatagan sa mga Filipino og katagbawan ang matag kasingkasing sa unom ka tuig nga pagdumala niini diha sa tiunay nga kabag-ohan sa nasud.