Human nga pila ka semana nga ang mga kaso sa Covid-19 misaka sa atong mga silingang lalawigan, sulod sa pipila ka adlaw nga miagi, naa na gyud kining maong panghitabo sa Lalawigan ug Syudad sa Sugbo.
Mas atong hisgutan kini kay sa hinubog nga Sona ni Presidente Rodrigo Duterte. Matod pa, ang Sona kay “Speech Only, No Accomplishment.”
Di na kita mahibulong sa Cebu City. Nagkayagaw na man ang kahimtang sa pangagamhanan. Karong nagsulod ug gawas si Mayor Edgar Labella sa hospital, atong gilantaw nga si Bise Mayor Mike Rama ang mag-acting mayor.
Apan nagsigi intawn og reklamo kini si Rama nga ang opisina ni City Administrator Floro Casas wala mo-coordinate kaniya. Gani, taud-taud na nga nagbinayloay og text silang Labella ug Rama.
Maglibog na sab kita basin si Casas na ang naghimog mga desisyon na karon nga nag-sick leave si Mayor Labella. Daghan ang mga spekulasyon kabahin sa iyang kahimtang. Basta niingon ang iyang anak sa media nga naa lang kiniy pneumonia. Nag-improve na kuno ug mobalik unya kini sa pagtrabaho.
Kay wa may paagi ang media unsaon kini pag-confirm, lahi ang mga istorya nga naa sa gawas.
Makalibog sab nganong way paagi ang media karon sa pag-confirm. Wa diay silay lawom nga connection sa medical community. Kay nganong wa gyud mag-develop og mga tinubdan nga mga usa ka tuig ug tunga na man unta ang pandemya?
Tungod niini, daghang mga istorya karon kabahin sa kahimtang sa mayor. Basta ang akoa lang nga seryuso gyud diay nga pulmonya. Na-ICU gud daw.
Apan kataw-anan ang kahimtang ni Bise Mayor Mike Rama. Daw ang masakiton, ingon pa gani ang mga mga nanungo nga hapit na mamatay kini, wa gyud diay salig ni Rama. Di siya mosalig nga makalingkod og tarong isip mayor.
Basin tuod duna pay maukay nga anomaliya sama sa nahitabo sa basura ug kining nakit-an sa COA. (DM nako sa @anol_cebu)