SUPERBALITA CEBU

Espinoza: Misaka na sad!

Nagpakabana

Giunhan na sa Probinsya sa Cebu ang Probinsya sa Bohol sa gidaghanon karon sa aktibo nga kaso sa coronavirus (Covid-19) samtang miubos ang mga kaso sa makamatay nga virus sa Probinsya sa Negros Oriental. Matod sa DOH 7 Case Bulletin No. 402 sa Hulyo 25, 2021, ang Cebu duna nay 1,888 nga aktibo nga kaso sa Covid-19, ang Bohol dunay 1,793 ug ang Negros Oriental 1,131.

Samtang ang Dakbayan sa Sugbo misaka usab kay dunay 2,085 nga aktibo nga kaso sa Covid-19 ug dunay 196 nga bag-o nga kaso. Ang Lapu-Lapu City dunay 979 nga aktibo nga kaso ug 64 nga bag-o nga kaso, samtang ang Mandaue City dunay 688, nga aktibo nga Covid-19 ug 47 nga bag-o nga kaso.

Ang pagsaka sa kaso Covid-19 tungod kini sa paglugak sa pagpatuman sa health protocols sama sa pagsul-ob sa mask ug social distancing ug sa pamatasan sa kadaghanan nga mokumpiyansa dayon ig-ubos sa kaso sa Covid-19. Wala ni kalabutan sa posisyon ni Gob. Gwen Garcia kabahin sa isyu sa swab testing sa mga moabot sa Mactan-Cebu International Airport gikan sa gawas nga nagtrokis sa protocols sa IATF-DOH.

Kadaghanan karon sa mosakay sa bus ug jeepney wala na motuman sa health protocols sama husto nga pagsul-ob sa face mask ug face shield bisan pa sa notisya nga “No Face Mask, No Face Shied, No Ride” nga gibutang sa ganghaan sa mga PUJ ug bus. Ang mga drayber tungod kay nag-apas usab nga mokita gibaliwa na lang ang health protocols. Ang partisipasyon sa kadaghanan sa PUJ mora na lang og dekorasyon imbis nga magprotiher sa mga pasahero.

Ang Cebu City Emergency Operations Center (EOC) nagtigum niadtong Dominggo aron paghisgot sa sitwasyon sa dakbayan. Ilang gisugyot nga iatras ang curfew gikan sa alas 11 sa gabii ngadto sa alas 10 sa gabii ug idili na usab ang pagtigum-tigum sa mga bar ug restaurant ingon man party sulod sa mga panimalay aron mapugngan ang pagsaka sa kaso sa Covid-19.

Mao ni angayan nga isulod sa alimpatakan sa katawhan nga kining kaso sa Covid-19 dili angay nga kumpiyansahan ug kadtong wala pa magpabakuna kay nahadlok, pabakuna na mo kay ang kadaghanan karon sa mga naigo sa Covid-19 wala pa mabakunahi. Angay mo nga mahadlok sa Covid-19 kay sa mahadlok mo sa dagum o epekto sa bakuna.

Sa miagi, ang kapulisan nagpatrolya nga nagdala og sukod (mora’g sungkod o bunal?) aron mamadlong sa mga tawo nga wa motuman sa pagsul-ob sa face mask ug face shield. Kinahanglan estrikto nga ipatuman usab sa LTO ug LTFRB sa mga operator ug drayber sa mga bus ug PUJ ang minimum health protocols. Maayo lang sa pagsugod kay kuhaan sa temperatora ang mga mosakay sa bus ug katunga lang sa kapasidad sa depasaheroan ang makasakay. Karon, maghuot ang mga pasahero labina sa oras ting-uli.

Sa laing bahin, unsa kahay gihimo nga kalihokan ang Probinsya sa Cebu aron mapugngan ang pagsaka sa kaso sa Covid-19, nga karon mas daghan pa sa Negros Oriental ug Bohol?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!