Karong unang semana pa sa Oktubre ang filing sa certificates of candidacy. Sa Pebrero ug Marso magsugod ang campaign period alang elections sa Mayo 2022. Apan karon pa lang nagsugod nag bukal ang kawa sa pulitika. Hinuon, matod pa sa uban, ang Pilipinas maoy adunay taas nga eleksiyon. Kay pagka ugma sa eleksiyon, sugod na dayon pod ang kampaniya.
Sa Dakbayan sa Sugbo, migimok na ang mga pulitiko. Atong makita sa social media, labi pa sa Facebook ang ilang mga kalihukan nga mora na og nangampaniya. Ang gipang-hire nga radio blocktimers nagyagaw na sa kahanginan aron ibandilyo ang ilang sponsors nga mga pulitiko. Ang uban nga gustong magpapili mikonsulta na sa local leaders labi pa sa mga barangay kapitan. Dunay nag feeding ug nag community outreach program.
Dinhi sa Dakbayan sa Sugbo, naporma nag gamay ang line-up sa administration coalition nga gilangkuban sa Barug, Kugi, Uswag Sugbo (Kusug) ug Panaghiusa. Gumikan kay dili naman magpasubli si Mayor Edgardo Labella gumikan sa problema sa panglawas, si Bise Mayor Mike Rama maoy molansar sa pagka-mayor . Iyang runningmate si Konsehal Raymond Garcia. Dili pa hinuon kompleto ang ilang line-up sa mga konsehal.
Si Konsehal Niña Mabatid maoy kandidato sa pagka-kongresista sa north district. Samtang pili-an pa sa south district kay daghan ang intrisado. Ang mga intrisado mao sila si Edu Rama, Joy Pesquera, Dondon Hontiveros ug Dave Tumulak. Aw, depende ra ni kon si kinsay mapilian.
Apan matod pa sa akong tinubdan resulbahon pa ang tandem nila ni Mike ug Raymond kay dili gusto si Rama nga si Garcia maoy iyang runningmate. Wala mohatag sa rason si Rama. Si Presidential Assistant for the Visayas Michael Dino ang mipili ni Garcia. Wala konsultaha si Rama. Gidudahan nga aduna pay ka-aligotgot si Rama ni Garcia kay nagkaatbang ni sila sa pagka-bise mayor sa 2007 elections diin gitawag ni Garcia si Rama nga “ulipon” ni Tomas Osmeña sa dihang diha pa siya sa BOPK. Ambot kon maresulbar ba kini. (bobbygnalzaro@gmail.com)