Pwerteng saka sa mga kaso sa coronavirus disease 2019 (Covid-19) sa Dakbayan sa Sugbo. Kapin na sa duha ka mga semana nga nag triple digit ang Covid-19 kada adlaw. Niadtong Hulyo 24 mao ang labing taas kay niabot og 300 kapin ang mga kaso.
Naalarma na ang Siyudad hinungdan nga nakigtagbo si Acting Mayor Michael Rama sa mga opisyal sa Emergency Operations Center (EOC) ug Regional Inter-Agency Task Force (RIATF) sa Dominggo sa hapon, Hulyo 25, 2021.
Nauyonan ang pagpatuman og balik sa liquor ban, pagsayo sa oras sa curfew ug pagdili sa mga tapoktapok.
Kinsa bay di malisang nga ning higayuna maora mag nibalik sa sinugdan ang gidaghanon sa mga kaso sa Covid-19. Naay maglinya sa mga emergency room ug duna nay mga ospital nga gikatahong wa una manawat og pasyente nga suspected Covid.
Hinuon di tanan taga Dakbayan sa Sugbo ang pasyente kay ang mga taga lalawigan ug ubang dapit sa Kabisay-an ug Mindanao nianhi dinhi.
Usa ra ang matumbok nga hinungdan ning pagsaka: kompyansa na ang mga tawo sa paggawas ug pagtapok. Di ka na kinahanglan pang mosuroy og malls kon gusto kang moobserbar sa lihok sa mga tawo. Ang dagan sa trapiko maoy usa sa mga indikasyon sa pagkompyansa na sa mga tawo.
Tan-awa ra gud sa rush hours, maghuot na ang mga sakyanan sa kadalanan. Mahisama na sa normal ang dagan karon. Ang nakalahi lang kay wa pay bisan usa ka tunghaan nga nibukas. Kay kon naa pa, ang kahuot sa trapiko mahisama sa pre-pandemic.
Magtapok na ang mga tawo kon dunay mga salo-salo sama sa birthday ug kasal. Scroll sa imong Facebook, naay daghang pictures sa mga tapok.
Masulbad lang ni kon ang tanan magpabakuna na. Kon ang gobiyerno mopaspas sa pagpamakuna. Kon wa pay bakuna, puyo lang una sa balay, ayaw sigeg suroy.