Duha ka senior citizens ang nakaplagang patay na sa managlahing dapit sa habagatan sa Lalawigan sa Sugbo.
Usa ka senior citizen patay na nakita sa Sitio Macupa, Barangay Magcagong, Lungsod sa Sibonga, pasado alas 6:00 sa buntag. Giila kini nga si Paulino Enao, 65, mananangot ug molupyo sa dapit.
Si Police Master Sergeant Michelle Ponce, imbestigador sa Sibonga Police Station, nagkanayon nga kataposang nakita sa pamilya nga buhi kini niadtong Sabado sa hapon, Hulyo 24, nga padulong mananggot.
Gabii na lang wa kini mauli. Gipangita sa pamilya ug pagka Lunes, Hulyo 26, sa buntag nakit-an kini nga patay na.
Laing senior citizen ang nakaplagan nga patay sa Sitio Oslob, Barangay Ubaub, lungsod sa Argao, alas 6:00 sa buntag niadtong Dominggo, Hulyo 25.
Si Lucio Albores Epogon, 70, minyo, ug nagpuyo sa nahisgutang lugar, namatay human napantok ang ulo sa dan tungod sa kahubog. (JDS, GPL)