Mag-agaw ang nalanding sa tambalanan human gitigbas og bolo sa ilang manag-igsuon nga silingan sa Zone Talong, Barangay Paknaan, Mandaue City, alas 7:30 sa gabii sa Dominggo, Hulyo 25.
Ang mga biktima mao sila si Ramil Nudalo, 28, ug Gildo Nudalo, 38, parehong taga Zone Talong, Barangay Paknaan.
Giila ang mga suspek nga sila si Redgie Paglinawan Mendoyos, 26, molupyo sa Zone Talong, Barangay Paknaan, Mandaue, ug Rex Paglinawan Mendoyos, 25, molupyo sa Sitio Bangkal, Barangay Mahayahay sa Lapu Lapu City.
Matod ni PLtCol. Mercy Villaro, tigpamaba sa Mandaue City Police Office (MCPO), nga base sa imbestigasyon, alas 7:30 sa gabii sa Dominggo, ang mga suspek ug ang mga biktima nagkalalisay sa wala pa matibo nga rason.
Ang duha ka suspek nakainom og ilimnong makahubog.
Nagsumbagay ang mga suspek ug ang biktima. Wala nakontento ang mga suspek ug nagkuha kini og bolo diha na nila gitigbas ang mag-agaw.
Matod ni Villaro, si Ramil nakaangkon og samad sa ulo ug Gildo nakaangkon og tulo ka tinigbasan sa lawas.
Gidala ang duha ka biktima sa Mandaue City Hospital apan gi-refer sa Vicente Sotto Memorial Medical Center.
Ang mga suspek gitanggong sa Basak Police Station. (KFD)