GIPASAKAAN og kaso ang 25 ka mga tawo nga nalambigit sa ilegal nga pagkuha ug pagpagawas og graba gikan sa Dakbayan sa Ormoc.
Ang insidente nahitabo, alas 9 sa gabii niadtong Hulyo 12, Lunes, sulod sa Yakal Port sa Barangay Macabug, dakbayan sa Ormoc.
Apil sa gikasohan ang tag-iya sa Yakal Construction ug Yakal Port nga si Violeta Codilla ug ang tag-iya sa barge nga si William Ko sa Uni-Orient Pearl Ventures, Inc.
Gipasaka nga kaso mao ang kalapasan sa section 103 sa Republic Act 7942 kun Philippine Mining Act; section 23 sa Ormoc City ordinance 94-74 nga giamyendahan sa City ordinance 43; section 2 sa Executive Order No. 17-A gumikan sa pagpagawas og baras ug graba gikan sa Ormoc ug Executive Order No. 5 gumikan sa pag-operate lapas alas 7:00 sa gabii.
Matod sa City Environment and Natural Resources Office (Cenro), ilang naaktohan ang 23 ka mga lalake nga nagsige og karga og graba sulod sa barge gamit ang mga dumptruck.
Ang maong graba niabot og 1,000 cubic meters.
Sa ilang pag inspeksyon, walay nakapakita og extraction permit ug transportation permit sa mga materyal nga dalhon kini sa Masbate.
“Bawal ang exportation sa sand and gravel materials tungod kay naa ta EO 17-A,” matod sa Cenro.
Narekober sa kapulisan ug taga Cenro ang usa ka barge nga dunay pangan nga Morning Valor nga iya sa Uni-Orient Pearl Ventures Inc; usa ka tugboat nga iya gihapon sa Uni-Orient; usa ka payloader nga walay dokumento; tulo ka dumptruck nga iya sa Yakal Construction ug graba nga 1,572.82 cubic meters.
Ang mga nadakpan gidala sa police station alang sa pagdokumento samtang naka impound naman karon sa Ormoc Bay ang barge ug tugboat.
Gawasnon na hinuon ang mga dinakpan human gi-dismiss sa piskalya ang reklamo. (JKDP)