Duha sa mga banggiitang beauty queen sa Sugbo ang dungan nga niapil karon sa Miss Universe Philippines (MUP) 2021 nga mao silang Binibining Cebu 2019 Steffi Aberasturi ug Binibining Cebu 2020 Beatrice Gomez.
Nagsabot kaha ni sila o gituyo ni sa ilang mga competing training camp?
Sa akong nahibaw-an si Steffi naa sa Kagandahang Flores (KF) nga mao say beauty camp ni Miss Universe Phils 2019 Gazini Ganados.
Samtang si Gomez ubos sa Aces and Queens nga mao say training camp karon nilang Asia’s Next Top Model’s first Filipina winner Maureen Wroblewitz, ug Pinoy Big Brother 2nd-place winner Kisses Delavin nga pareho sad mga kandidata karon sa MUP.
Siguradong anhi na masuwayan ang pagka- “undefeated beauty queen” ni Steffi.
Akong gisuwayan ang kampo ni Steff kon puwede ba siya ma-interbyu apan mananghid pa kuno siya sa organizer sa MUP sa Manila.
OLE LIVE MUSIC
Duna na diay bag-ong pangan ang Slabadu. Gitawag na ni karon og “Ole Live Music + Bar.”
Ang launching party sa bag-o nilang pangan gihimo niadtong July 14 sa mao gihapon nga building diha sa Hernan Cortes, Mandaue city.
Kon sa una usa ray tag-iya karon tulo na sila nga puros babaye. Ang Slabadu mao ang labing karaan nga resto bar sa Sugbo nga unang gipanag-iya sa pamilyang Nadela niadtong dekada `80 diha pa to ubos sa Belvic Theatre sa Gen. Maxilom Avenue.
Ang Ole nag-feature gihapon sa mga beteranong musikero sa Sugbo sama sa Firelights Band ug Southside Band.
DUTERTE RESIGN
Ang award-winning singer ug musician nga si Bayang Barrios nga maoy nikanta sa national anthem sa SONA ni Duterte niadtong 2016 ang nanawagan na karon sa iyang resignation.
Atol sa SONA ni Duterte gahapon tataw nga daghan ang wa mahimuot labi na nga wa gyud kunoy klarong kwentada kon giunsa nila paggasto ang kuwarta sa mga tawo.
Ang budget sa Pilipinas sa karon lang tuiga mikabat sa P4.5 trillion. Covid pa more!
MGA BULAY-OG
Usa ko sa mga nasagmuyo niadtong Dominggo dihang napildi na sad ang USA Basketball Team sa una pa lang gani nilang duwa batok sa France nga gilupig man gani ni sa Japan sa exhibition game.
Bisan pa’g dream team ang ipada sa Olympics kon kuwang sa preparasyon maglisud lagi gihapon.
Magsilbi na diha ra sila nakumpleto pila ka oras sa wala pa ang duwa. Oki ra to panahon ni Michael Jordan. Karon lahi na. Maleksyon na unta ni sila.