Gihangop sa Brgy. Day-as, Cebu City ang usa ka programa sa natad sa paugnat sa kusog alang sa ilang tinguha nga mahilikay ang kabatan-unan sa tentasyon sa paggamit og ginadili nga drugas.
Ning bag-uhay lang, gisugdan sa Brgy. Day-as ang ilang summer grassroots sports program pinaagi sa pagpakigtambayayong sa Yaw-Yan Ardima Cebu.
Ang programa, nga gidumala ni Master Benigno “Ekin” Caniga Jr., gihatagan og kinatibuk-ang suporta ni Brgy. Captain Freddie T. Esmas ug sa konseho.
Mahimong makat-unan sa programa ang nagkadaiyang natad sa martial arts sama sa kickboxing, Muay Thai, boxing, Yaw-Yan Combat Self-Defense, ug mixed martial arts (MMA).
“Open ni sa tanang mga batan-on, hamtong, babaye, lalake, LGBT. No age limit, dili lang sa taga Day-as apil ang taga ubang barangays, welcome mo diri sa Day-as,” matod ni Master Ekin, kinsa usa sab ka konsehal sa Day-as.
“Para ma-develope ang ilang martial arts skills ug makakat-on pud sila og self-descipline. Mao ni among tinguha ug tumong ni Brgy. Captain Freddie Esmas ug sa council nga ang mga batan-on malikay sa gidiling drugas ug uban pa... Join us, we are one.”
Nanghinaot si Master Ekin nga makadani sila og daghang kabatan-unan ning maong lakang gamikan kay alang kini sa kaayuhan.
Dako ang pasalamat ni Master Ekin nga gisuportahan ni Brgy. Captain Esmas kining maong proyekto.
"Nagpasalamat gyud ko sa atong kapitan kay supportive kaayo siya ning maong programa ug hasta sa akong mga kauban sa council.
Ang programa ipahigayon matag Sabado sa alas 3:00 hangtod alas 5:00 sa hapon sa Brgy. Day-as Sports Complex.
Alang sa dugang mga detalye, mahimong mo-contact sa 0943-6568900. (ESL)