I-release ang suweldo sa job order (JO) nurses sa Cebu City Medical Center (CCMC) kon maaprobahan sa konseho ang Supplemental Budget (SB) number 1 nga gipangayo sa executive department.
Kini ang gipadayag ni Acting Mayor Michael Rama human wala makadawat sa ilang suweldo ang mga nurse sulod na sa upat ka buwan gumikan sa pagkalangan sa pagpasar sa SB diin gisukip ni Mayor Edgardo Labella ang suweldo sa JO nurses.
Si Hospital Administrator Yvonne Cania sa CCMC naanugnan sa maong mga nurse sanglit sila maayong manarbaho ug posible nga maapektohan ang ilang pagtunol sa batakang serbisyo sa maong tambalanan kay kuwang na sila og tawo.
Base sa record sa CCMC, gipahibawo ni Cania nga niadtong tuig 2020, 21 ka mga casual nurse ang ning-resign ug 14 sa nurse karong tuiga diin gipadayag sa hospital administrator nga sila niundang og trabaho kay nakuha na nila ang ilang US ug UK visas para sa ilang pag-abroad.
Sa mga JO, niabot na og 30 ka mga nurse ang ning-resign, 9 ka mga doktor, 4 ka radio technologists, 3 ka medical technologists, 5 sa drivers ug 10 ka utility workers.
Matod ni Cania nga numero unong rason nga nipahawa ang mga JO gumikan sa pagkalangan sa ilang mga suweldo sanglit aduna silay gipakaon nga miyembro sa pamilya.
Gipadayag ni Cania nga daan nang nagkuwang labi na nga gihatagan siya og direktiba ni Rama nga ipadali og abli ang ikaduha ug ikatulong andana sa bag-ong CCMC sanglit ang uban nilang personnel nadestino usab sa Cebu City Quarantine Center sa pag-atiman sa mga pasyente. (PAC)