Nihimo si Presidente Rodrigo Duterte sa labing taas nga State of the Nation Address (Sona).
Sa iyang ikaunom ug kataposang Sona kagahapon, Hulyo 26, 2021 niluntad og dul-an sa tulo ka oras. Ang iyang duha ka oras ug 46 minutos nga pakigpulong gisugdas sa alas 4:13 sa hapon ug nitapos sa alas 6:59 sa gabii.
Nalabwan ni Duterte ang record ni kanhi President Benigno Aquino III, kinsa nihimo og duha ka oras ug 15 minutos sa iyang kataposang Sona sa 2015.
Gisaysay tanan ni Duterte ang iyang nabuhat apan niingon nga dili igo ang unom ka tuig nga matuman ang tanan niyang saad sa kampanya, sama sa gubat sa gidiling drugas nga gibandera sa iyang administrasyon.
Naminos apan wala hingpit napapas ang korapsiyon. Apan malipayon siya sa daghang inprastraktura nga nabarog sa administrasyon.
Gipasalamatan niya ang frontliners sa pakigbatok sa Covid-19. Kini ug daghang pa ang iyang gitaho (kompletong detalye naa sa www.sunstar.com.ph). (RRM)